15.12.2025 | 15:31
Արարատի մարզի որոշ շրջաններում 24 ժամ ջուր չի լինի
Քանի՞ մարդ է պառկեցրել ոստիկանությունն ասֆալտներին՝ կհայտարարվի պաշտոնական հաղորդագրությամբ
Քաղաքականություն
12.09.2018 | 11:15
Երեկ Դավթաշենում «Իմ քայլը» դաշինքի հանրահավաքի ժամանակ ՀՀ վարչապետ Նիկոլ Փաշինյանն, անդրադառնալով ԱԱԾ տնօրենի և ՀՔԾ պետի հեռախոսազրույցի գաղտնալսմանը, նշեց, որ հանձնարարում է ԱԱԾ-ին, ոստիկանությանը՝ ամենակարճ ժամանակահատվածում հայտնաբերել դավադրությունը կազմակերպածներին և նրանց ենթարկել ամենախիստ պատասխանատվության:
«Այդ բոլոր՝ չակերտավոր հատուկ ծառայությունները «սափրագլուխների» և «ախրանաների» տեսքով հայտնաբերվելու և ոչնչացվելու են: Բոլոր ապօրինի զինված խմբավորումները զինաթափվելու են: Այստեղից ես ԱԱԾ-ին, ոստիկանությանը հրահանգում եմ այս պահից իրականացնել ռեյդեր, օլիգարխների, բարձրաստիճան պաշտոնյաների թիկնազորներին պառկեցնել ասֆալտներին և զինաթափել բոլորին»:
Factor.am-ն այսօր ՀՀ ոստիկանությունից փորձեց պարզել՝ ինչ քայլեր է իրականացրել Ոստիկանությունը վարչապետի հրահանգից հետո, օլիգարխների, բարձրաստիճան պաշտոնյաների թիկնազորների քանի անդամ են պառկեցրել ասֆալտներին:
Հարցին ի պատասխան` Ոստիկանության հասարակայնության հետ կապի և լրատվության վարչությունից տեղեկացրեցին․ «Վարչապետ Նիկոլ Փաշինյանի երեկվա հրահանգից հետո ՀՀ ոստիկանությունը իրականացրել է մի շարք միջոցառումներ, որոնք այս պահին հրապարակման ենթակա չեն»։
Ճշտող հարցին՝ իսկ այդ միջոցառումների արդյունքում քանի մարդ է բերման ենթարկվել, պատասխանեցին. «Այս մասին ոստիկանությունը կհայտնի պաշտոնական հաղորդագրությամբ»։
Նշենք, որ հարցերի վերաբերյալ փորձեցինք տեղեկություն ստանալ նաև Ազգային անվտանգության ծառայությունից, սակայն անարդյունք։
