22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Գազայի հատվածում փախստականների ճամբարին Իսրայելի ավիահարվածի հետևանքով 18 մարդ է զոհվել․ CNN
Քաղաքականություն
12.09.2024 | 13:00
Գազայի հատվածի կենտրոնում պաղեստինցի փախստականների «Նուսեյրաթ» ճամբարին Իսրայելի օդային հարվածի հետևանքով զոհվել է առնվազն 18 մարդ, վիրավորվել՝ 44-ը, հայտնում է CNN-ը:
Մահացածների թվում են Մերձավոր Արևելքում Պաղեստինի փախստականների հարցերով ՄԱԿ-ի գործակալության (UNRWA) վեց աշխատակիցներ։ Կազմակերպությունից հաստատել են տեղեկությունը։
Նախօրեին Իսրայելի պաշտպանության բանակը (IDF) հաղորդել էր նախկին Ալ-Ջաունի դպրոցի շենքին հարվածելու մասին։ Այնտեղ, ըստ իսրայելցի զինվորականների, ՀԱՄԱՍ շարժման զինյալ թևի անդամներ են եղել, դպրոցի շենքը զինյալներն օգտագործել են Իսրայելի պաշտպանության բանակի «զորքերի դեմ ահաբեկչական հարձակումներ ծրագրելու և իրականացնելու համար»:
UNRWA-ն հաղորդել է մեկ միջադեպի արդյունքում ամենաշատ թվով սպանված անձնակազմի մասին: Համաձայն UNRWA-ի գնահատականների՝ շուրջ 12 հազար պաղեստինցի փախստականներ էին պատսպարվել Ալ-Ջաունի դպրոցում։
Al Jazeera հեռուստաալիքն իր հերթին հայտնում է, որ սեպտեմբերի 10-ին Իսրայելը հարձակվել է Գազայի հարավում գտնվող պաղեստինցի փախստականների վրանային ճամբարի վրա։ Հարձակման արդյունքում, հեռուստաալիքի տվյալներով, զոհվել է 40, վիրավորվել՝ 60 մարդ։ Նույն օրը Իսրայելի պաշտպանության բանակը հաղորդել է պաղեստինյան ՀԱՄԱՍ շարժման հրամանատարական կենտրոնի վրա հարվածի մասին, որը «քողարկված է եղել որպես մարդասիրական գոտի Ալ-Մավասիում՝ Խան Յունիսի մոտ»։
