16.11.2024 | 14:15
NYMEX. Թանկարժեք մետաղների գները նվազել են
Վաչագան Ղազարյանի գործը կարճվե՞լ է․ ՀՔԾ պարզաբանումը
Քաղաքականություն
10.09.2018 | 16:16
Factor.am-ը տեղեկություններ ստացավ այն մասին, որ Պետական պահպանության ծառայության պետի նախկին առաջին տեղակալ, երրորդ նախագահ Սերժ Սարգսյանի թիկնազորի նախկին պետ Վաչագան Ղազարյանի նկատմամբ հարուցված քրեական գործը կարճվել է։
Նշենք, որ Վաչագան Ղազարյանին հունիսի 25-ին մեղադրանք էր առաջադրվել Բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում իր ունեցած դրամական միջոցների իրական չափի մասին հայտարարագրման ենթակա տվյալները թաքցնելու, ինչպես նաև ապօրինի հարստանալու համար:
Տեղեկությունը փորձեցինք ճշտել Հատուկ քննչական ծառայությունից։
Կառույցի մամուլի խոսնակ Մարինա Օհանջանյանը հայտնեց, որ Վաչագան Ղազարյանի նկատմամբ հարուցված քրեական գործը չի կարճվել։ «Վաչագան Ղազարյանի նկատմամբ հարուցված քրեական գործը չի կարճվել։ Նախաքննությունը շարունակվում է։ Նույն գործի շրջանակներում քննվում է նաև նրա կնոջ՝ Ռուզաննա Բեգլարյանին առաջադրված մեղադրանքը, որը վերաբերում էր նրան, որ նա, հանդիսանալով հայտարարատու պաշտոնատար անձ Ղազարյանի ընտանիքի կազմի մեջ մտնող անձ, թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները, ինչպես նաև ապօրինի հարստացել է»,- մեզ հետ զրույցում ասաց ՀՔԾ մամուլի խոսնակը։
Հիշեցնենք, որ ապօրինի հարստացման մեջ մեղադրվող Վաչագան Ղազարյանն ազատ արձակվեց հուլիսի 24-ին, նրա նկատմամբ խափանման միջոցը փոխելու համար դատարանը պահանջեց 1 մլրդ դրամ գրավ, որն էլ վճարվեց, իսկ Ռուզաննա Բեգլարյանի նկատմամբ որպես խափանման միջոց է ընտրվել ստորագրությունը չհեռանալու մասին:
