Պատերազմ լինելո՞ւ է՝ խնդիրը դա է․ Արևմուտքը ՀՀ-ին օգնում է՝ Ադրբեջանի հարձակման գինը մեծացնել․ պայմանագիրը 100 տարի գուցե չլինի․ Արմեն Հովհաննիսյան. ՏԵՍԱՆՅՈՒԹ

Թեև Բաքուն մերժեց 17-ից 13 համաձայնեցված կետերով հանդերձ՝ խաղաղության պայմանագիր ստորագրելու Երևանի առաջարկը, այսօր ևս ՀՀ վարչապետը կրկնեց իր առաջարկը։ Փաշինյանը նախ վերահաստատեց, որ համաձայնագրի 80%-ը համաձայնեցված է, ապա պարզաբանեց․ «13 հոդվածներ և նախագծի նախաբանն ամբողջությամբ համաձայնեցված են, ևս 3 հոդվածներ, որոնք բաղկացած են հիմնականում 2 նախադասությունից, մասնակի համաձայնեցված են, այդ հոդվածների նախադասություններից մեկը համաձայնեցված է, մյուսը՝ համաձայնեցված չէ»։

Սա փակուղի՞ է, պայմանագիր չի՞ ստորագրվի, թե ճեղքում հնարավոր է։ Քաղաքական վերլուծաբան Արմեն Հովհաննիսյանը Factor TV-ի հետ հարցազրույցում ասում է, որ Ադրբեջանն է փակուղի մտցրել պայմանագրի կնքումը, սակայն Արևմուտքին ցույց է տալիս, որ ՀՀ-ն է ձախողում․

«Իսկ Փաշինյանի իշխանությունը կամավոր-պարտադիր ձևով մատուցում է ծառայություններ Ադրբեջանին։ Ցույց է տալիս, որ չէ՝ գիտեք, մենք դելիմիտացիան առանձնացրել և ստորագրել ենք, 80 տոկոսը համաձայնեցված է պայմանագրի դրույթների, ՀՀ-ն հաստատում է դա, ՀՀ-ն համաձայնվել է, որ COP29 համաժողովը լինի Բաքվում։ Ադրբեջանի չցանկանալը ստորագրել պայմանագիր՝ այսպիսի աջակցություն է ստանում ՀՀ կողմից։ Եթե ՀՀ իշխանության գործունեության առանցքը Խաղաղության պայմանագիրն է, ապա՝ այդ հարցում շատ հետևողական և կոշտ պետք է լինեին»,- նշեց վերլուծաբանը։

Փաշինյանն օրերս հայտարարեց, թե պատրաստ են ճանապարհ տրամադրել Ադրբեջանին՝ Նախիջևանի հետ կապի համար` առանց Հայաստանի տարածքային ամբողջականությունն ու սահմանների անխախտելիությունը կասկածի տակ դնելու: Իբրև տարբերակ Փաշինյանը խոսել է անվտանգության ապահովման գործառույթը մասնավոր պահնորդական կազմակերպությանն արտապատվիրակելու մասին։ Իրանի բազում պաշտոնյաներ ողջունել են Հարավային Կովկասում տրանսպորտային ուղիների ապաշրջափակումը ռեգիոնի երկրների ինքնիշխանության շրջանակներում՝ հայտարարելով, որ դեմ է միջազգային սահմանների ցանկացած փոփոխության։ Եվ սա ի պատասխան ՌԴ-ի։ Երեկ ՀՀ ԱԳՆ-ն հայտարարեց՝ որևէ բան, որը ենթադրում է միջանցքի ստեղծում և դրա վերահսկողության հանձնում որևէ այլ կողմի, չի քննարկվում։

Իրանի Ազգային անվտանգության խորհրդի քարտուղար Ալի Աքբար Ահմադիանն այսօր առավոտյան Թեհրանից մեկնել է Սանկտ Պետերբուրգ՝ մասնակցելու BRICS-ի անդամ երկրների անվտանգության հարցերով բարձրաստիճան պաշտոնյաների հանդիպմանը, հաղորդում է իրանական IRNA գործակալությունը։ Ըստ հաղորդման՝ Ահմադիանը Ռուսաստանի բարձրագույն ղեկավարության հետ կքննարկի տարածաշրջանում տեղի ունեցող կարևորագույն զարգացումներն, ինչպես նաև քաղաքական և տնտեսական հարցեր։ Օգոստոսի 5-ին Ռուսաստանի անվտանգության խորհրդի քարտուղար Սերգեյ Շոյգուն էր Թեհրանում, նա Թեհրանից մեկնեց Բաքու։ Իրանցի պաշտոնյան Ռուսաստանում կքննարկի նաև «Զանգեզուրի միջանցքի» հարցը։ Ի՞նչ սպասել․

«Պուտինը սրեց միջանցքի պահանջը ՀՀ-ին՝ Բաքու այցով։ Իրանը խաբված է զգում իրեն, որ իր շահերը ոտնահարում են, ՌԴ-ին սուր և հիվանդագին պատասխան է տալիս։ Ինչո՞ւ Պուտինը գնաց այդ քայլին․ այստեղ երկու պատճառ կա։ Մեկն այն է, որ ՌԴ-ն ուզում է այրվող խնդիրները աշխարհում շատացնել, որպեսզի Արևմուտքի ուշադրությունը Ուկրաինայից շեղվի տարբեր ուղղություններով՝ դեպի Մերձավոր Արևելք, Հարավային Կովկաս և այլն։ Եթե այստեղ կայունություն հաստատվի, Արևմուտքի ուշադրությունը ռուս-ուկրաինական ճակատի վրա կուղղվի։ Եվ երկրորդ գործոնն այն է՝ ՌԴ-ն հասկանում է, որ Արևմուտքի սահմանը փակ է իրենց համար, և ՀՀ-ով միջանցքը կյանքի ճանապարհ է իրենց համար՝ դեպի Արևմուտք բլոկադան հաղթահարելու միջոց։ Այսօր ՌԴ-ի միակ պատերազմական լծակը ՀՀ-ի դեմ Ադրբեջանն է, այլ լծակ չունի ՀՀ-ի դեմ, որ հակրադրի միջանցքին համաձայնվել։ ՌԴ-ն ո՞վ է, որ Իրանի հետ պայմանավորվի։ Ալիևը ՀՀ-ին սպառնում է ուժով, երբ Պուտինի հետ է․ Իտալիայում երդվում էր՝ խաղաղասեր է, հայերի և ադրբեջանցիների համար նոր դարաշրջան է բացվում, ՌԴ-ն ասում է՝ ճիշտ ես անում աչքերն էլ հանիր։ Ադրբեջանի հետ 100 տարի կարող է պայմանագիր չկնքվել, հարցն այն է՝ ամեն օր վախի մե՞ջ ենք ապրելու, պատերազմ լինելո՞ւ է, թե՝ ոչ։ Խնդիրը ոչ թե թղթի կտորն ունենալն է, այլ այն, որ Ադրբեջանը քեզ վրա չի հարձակվելու։ Արևմուտքը առաջարկում է մեզ ապրել այնպիսի օրակարգով, որ Ադրբեջանի հարձակման գինը բարձր լինի, որն ի վիճակի չէ տալ»,- նշեց Արմեն Հովհաննիսյանը։

Հարցազրույցն ամբողջությամբ՝ տեսանյութում։

Ռոբերտ Անանյան