15.12.2025 | 10:52
Կա հանրային պահանջ՝ տրանսպորտում վերահսկողությունը խստացնելու, 24 հաստիք կավելանա․ Ավինյան. ՏԵՍԱՆՅՈՒԹ
ՌԴ դատախազությունը բեկանել է Նավալնիի մահվան կապակցությամբ գործ հարուցելը մերժելու՝ Քննչական կոմիտեի որոշումը
Քաղաքականություն
03.09.2024 | 15:24
ՌԴ Յամալ-Նենեց ինքնավար օկրուգի դատախազությունն անօրինական է ճանաչել և չեղարկել է Քննչական կոմիտեի որոշումը՝ մերժել քրեական գործ հարուցել ընդդիմադիր գործիչ Ալեքսեյ Նավալնիի մահվան կապակցությամբ։ Այս մասին ասվում է Կոռուպցիայի դեմ պայքարի հիմնադրամի տնօրեն Իվան Ժդանովի հրապարակած փաստաթղթում, փոխանցում է Meduza-ն։
«Սա չի նշանակում, որ քրեական գործ է հարուցվելու։ Սա նշանակում է, որ ստուգումը կշարունակվի։ Նրանք կմտածեն, թե ինչպես այլ կերպ ներկայացնեն Ալեքսեյ Նավալնիի սպանությունը։ Կամ այդ «ստուգումը» անվերջ կիրականացնեն»,- նշել է Ժդանովը։
Դատախազության որոշման մեջ ասվում է, որ «նյութն ուղարկվել է Յամալ-Նենեց ինքնավար օկրուգի՝ ՌԴ Քննչական կոմիտեի հատկապես կարևոր գործերի քննության բաժին»։
Օգոստոսի 15-ին քաղաքական գործչի այրին՝ Յուլիա Նավալնայան, հայտարարել էր, որ ստացել է Յամալ-Նենեց ինքնավար օկրուգի քննչական կոմիտեի որոշումը։ Այնտեղ նշվում էր Նավալնիի մահվան կապակցությամբ քրեական գործ հարուցելուց հրաժարվելու մասին։
