Զելենսկին պատրաստվում է ԱՄՆ նախագահին փոխանցել Ուկրաինայի հաղթանակի ծրագիրը․ դրա մասերից մեկը «Կուրսկի օպերացիան» է

Ուկրաինայի նախագահ Վլադիմիր Զելենսկին պատրաստվում է սեպտեմբերին ԱՄՆ նախագահ Ջո Բայդենին փոխանցել պատերազմում Ուկրաինայի հաղթանակի ծրագիրը, որը ներառում է չորս ոլորտ։ Դրանցից մեկը Ուկրաինայի զինված ուժերի հարձակումն է Կուրսկի շրջանում, մամուլի ասուլիսում ասել է Զելենսկին, փոխանցում է Մեդուզան։

«Ուղղություններից մեկը, որի մի մասն արդեն կատարված է, Կուրսկի շրջանն է։ Երկրորդ ուղղությունը Ուկրաինայի ռազմավարական տեղն է աշխարհի անվտանգ ենթակառուցվածքում։ Երրորդ ուղղությունը Ռուսաստանին պատերազմը դիվանագիտորեն ավարտել ստիպելու հզոր փաթեթն է։ Չորրորդը տնտեսական է, ես դրա մասին մանրամասն չեմ խոսի»,- ասել է Զելենսկին։

Նրա խոսքով՝ «արդար» կլինի, եթե հաղթանակի ծրագիրը նախ ներկայացվի ԱՄՆ նախագահին, քանի որ դրա հաջողությունը կախված է նրանից՝ արդյո՞ք Սպիտակ տունը կտա Ուկրաինային այն, ինչ նշված է այս ծրագրում։ Զելենսկին ասել է, որ ծրագիրը կներկայացնի սեպտեմբերին Ջո Բայդենի հետ հանդիպմանը։

«Ես կարծում եմ նաև, որ ճիշտ կլինի այս ծրագիրը փոխանցել և՛ Քամալա Հարրիսին, և՛ Դոնալդ Թրամփին, քանի որ մենք չգիտենք, թե ով կլինի նախագահ, բայց մենք իսկապես ցանկանում ենք իրականացնել այս ծրագիրը»,- հավելել է Զելենսկին։

Բացի այդ, Ուկրաինայի նախագահը նշել է, որ «Կուրսկի օպերացիան» կապված է նաև խաղաղության երկրորդ գագաթնաժողովի հետ, որը պատրաստվում է անցկացնել Ուկրաինան։

«Կուրսկի օպերացիան կապվա՞ծ է խաղաղության երկրորդ գագաթնաժողովի հետ։ Այո, քանի որ Կուրսկի գործողությունը Ուկրաինայի հաղթանակի ծրագրի կետերից մեկն է»,- ասել է Զելենսկին։

Նախագահի գրասենյակի ղեկավար Անդրեյ Երմակն ավելի վաղ հայտարարել էր, որ Ուկրաինան ցանկանում է խաղաղության երկրորդ գագաթնաժողովն անցկացնել «համաշխարհային Հարավի» երկրներից մեկում։