09.09.2026 | 18:30
Թմրանյութ կուլ տալով փախե՞լ է, թե՞ խոշտանգվել․ փաստաբանի ահազանգի հետքերով․ ՏԵՍԱՆՅՈւԹ
Բայդենն ու Մոդին վերահաստատել են Ուկրաինայում հակամարտության խաղաղ կարգավորմանն իրենց աջակցությունը
Քաղաքականություն
27.08.2024 | 12:21
Հնդկաստանի վարչապետ Նարենդրա Մոդին երկուշաբթի հեռախոսազրույց է ունեցել ԱՄՆ նախագահ Ջո Բայդենի հետ Ուկրաինա կատարած այցի վերաբերյալ։ Զրույցի ընթացքում Բայդենը հույս է հայտնել, որ Հնդկաստանի վարչապետն ընդունել է Կիևի տեսակետը ռուսական ներխուժման վերաբերյալ, գրում է VOA-ն։
Մոդին, որը վերջերս Մոսկվայում գրկախառնվել էր ՌԴ նախագահ Վլադիմիր Պուտինին՝ զայրացնելով ուկրաինացիներին, ուրբաթ այցելեց Կիև և նախագահ Վլադիմիր Զելենսկիին ասաց, որ «ոչ մի խնդիր չպետք է լուծվի մարտի դաշտում»։
Բայդենի հետ հեռախոսազրույցի ընթացքում Մոդին «վերահաստատել է Հնդկաստանի անփոփոխ դիրքորոշումը երկխոսության և դիվանագիտության օգտին ու լիակատար աջակցություն է հայտնել խաղաղության և կայունության շուտափույթ վերադարձին», ասվում է Հնդկաստանի արտաքին գործերի նախարարության հայտարարության մեջ։
Բայդենի արձագանքի մասին հարցին ի պատասխան՝ Ազգային անվտանգության խորհրդի խոսնակ Ջոն Քիրբին ասել է, որ Միացյալ Նահանգներն աջակցում է բոլոր երկրներին, որոնք պատրաստ են լսել Զելենսկիի տեսակետները պատերազմի ավարտի վերաբերյալ։
«Մենք ողջունում ենք ցանկացած այլ երկրի, որը ցանկանում է օգնել նախագահ Զելենսկիին՝ հասնելու արդար խաղաղության»,- ասել է Քիրբին լրագրողներին։
Ավելի ուշ Սպիտակ տունը հեռախոսազրույցի վերաբերյալ զեկույց է հրապարակել, որում ասվում է, որ Բայենը «գովել է վարչապետին» նրա «խաղաղության ուղերձի և Ուկրաինային մարդասիրական օգնության համար, այդ թվում՝ էներգետիկ ոլորտին»։
Մոդին և Բայդենը «վերահաստատել են իրենց հավատարմությունը հակամարտության խաղաղ կարգավորմանը՝ միջազգային իրավունքին համապատասխան՝ հիմնված ՄԱԿ-ի կանոնադրության վրա», հայտնել են Սպիտակ տնից:
