Կուրսկում ամբողջ Գլուշկովսկի շրջանի պարտադիր տարհանում է հայտարարվել

Կուրսկի շրջանում հայտարարվել է Գլուշկովսկի շրջանի ամբողջ տարածքի պարտադիր տարհանում։ Այս մասին Telegram-ում հայտնել է շրջանի նահանգապետի պաշտոնակատար Ալեքսեյ Սմիրնովը, գրում է Current Time-ը։

«Տարածաշրջանային օպերատիվ շտաբը որոշում է կայացրել Գլուշկովսկի շրջանի պարտադիր տարհանման մասին։ Ինչպես նախկինում հաղորդվել է, տեղի բնակիչների հեռացման գործընթացի համակարգումը վստահված է անվտանգության ուժերին, տեղական վարչակազմին և Կուրսկի «Պատրիոտ» կենտրոնի հսկիչներին»,- ասվում է Սմիրնովի հայտարարության մեջ:

Նա նաև կոչ է արել քաղաքացիներին «ըմբռնումով վերաբերվել ներկա իրավիճակին և հետևել անվտանգության ուժերի ու տեղի իշխանությունների բոլոր առաջարկություններին»։

Երկու ժամ առաջ հաղորդվել էր, որ պարտադիր տարհանում կիրականացվի միայն Գլուշկովո գյուղում, որը գտնվում է Ուկրաինայի հետ սահմանից մոտավորապես 7 կիլոմետր հեռավորության վրա։

«Ազատություն» ռադիոկայանը, վկայակոչելով ռուսական «ռազմական թղթակիցների» հրապարակումները, գրում է, որ տարածաշրջանային իշխանությունների կողմից տարհանման որոշումը կարող էր ընդունվել Ուկրաինայի զինված ուժերի կողմից ենթակառուցվածքային օբյեկտների գնդակոծման ֆոնին, որոնց նպատակն է խաթարել ռուսական բանակի ռեզերվների տեղափոխման նյութատեխնիկական ուղիները։

Գլուշկովսկի շրջանը սահմանակից է Սուջայի շրջանին, որտեղ մարտերը շարունակվում են օգոստոսի 6-ից։ Շրջանի բնակչությունը, 2022 թվականի սկզբի դրությամբ, կազմում էր մոտ 20 հազար մարդ։