21.06.2026 | 14:12
Ղրիմում բենզինի վաճառքն ամբողջությամբ դադարեցվել է
Ադրբեջանի կառավարությունը ֆինանսավորել է Նյու Յորքի քաղաքապետի օգնականների այցը Բաքու․ Politico
Քաղաքականություն
08.08.2024 | 20:00
Նյու Յորքի քաղաքապետ Էրիկ Ադամսի նախկին օգնականը, որի տանը դաշնային գործակալներն անցած տարվա աշնանը խուզարկություն են անցկացրել, Ադամսի մեկ այլ օգնականի հետ այցելել է Ադրբեջան: Այս մասին են վկայում քաղաքապետարանի կողմից տրամադրված հանրային փաստաթղթերը, գրում է Politico-ն։
Ադրբեջանի կառավարությունը վճարել է քաղաքապետի երկու օգնականների երկիր այցերի համար՝ ռեյդերից մի քանի ամիս առաջ, որը ներկայացվել է որպես տնտեսական զարգացման ճամփորդություն։
Նշվում է, որ Ադրբեջանի սփյուռքի հետ աշխատանքի պետական կոմիտեն ծածկել է ծախսը մինչև 5,000 դոլարի չափով՝ անցյալ տարի քաղաքապետարանի միջազգային հարցերով հանձնակատար Էդվարդ Մերմելշտեյնի երկիր այցի համար։ Քաղաքապետարանի խոսնակը հաստատել է, որ Մերմելշտեյնին Ադրբեջանի մայրաքաղաք Բաքվում միացել է Ռանա Աբբասովան, որը 2023 թվականի ապրիլի 29-ից մայիսի 2-ը քաղաքապետարանի արարողակարգի տնօրենն է եղել։
Ադամսի վարչակազմն Աբբասովային արձակուրդ է տվել անցած նոյեմբերին, երբ ՀԴԲ գործակալները ներխուժել էին նրա տուն և հանրությանն ահազանգել Ադամսի՝ 2021 թվականի քաղաքապետի ընտրարշավի ժամանակ թուրքական կառավարության հետ կապերի հետաքննության մասին: Աբբասովայի ընտանիքը սերում է Ադրբեջանից, որի կառավարությունը սերտ կապեր ունի Թուրքիայի հետ։ Աբբասովան Ադամսի համար թուրքական կողմի հետ միջնորդ է հանդիսացել, երբ վերջինը Բրուքլինի շրջանի նախագահն էր, ինչը չվարձատրվող պաշտոն է:
Ուղևորության հաշվարկված արժեքը ներառել է 1650 դոլար ավիատոմս ինչպես Մերմելշտեյնի, այնպես էլ Աբբասովայի համար։ Կառավարությունը 540 դոլար է վճարել Մերմելշտեյնի հյուրանոցում մնալու համար։ Քաղաքապետարանից հայտնել են, որ Աբբասովան մնացել է ընտանիքի հետ:
Այցը, որի մասին նախկինում չէր հաղորդվել, ներառված է Մերմելշտեյնի 2023 թվականի ձևաթղթում և ստացվել է երեքշաբթի: Ադամսը երկար ժամանակ զարգացրել է հարաբերություններն Ադրբեջանի հետ, նա առնվազն երկու անգամ այցելել է երկիր՝ 2012 և 2016 թվականներին։
Անցյալ տարի Մերմելշտեյնը և Աբբասովան Ադրբեջանից վերադառնալուց ընդամենը շաբաթներ անց հանդիպել են Ադրբեջանի կառավարության ներկայացուցչի հետ՝ քննարկելու Նյու Յորքի և Ադրբեջանի միջև ուղիղ չվերթների վերականգնման հարցը։ Բացի այդ, Ադամսի քաղաքական հարցերով խորհրդական Ֆրենկ Քարոնեն անցյալ սեպտեմբերին հանդիպել է Ադրբեջանի կառավարության բարձրաստիճան պաշտոնյայի հետ: Աբբասովան, Մերմելշտեյնը և Քարոնեն Թուրքիա են մեկնել 2022 թվականի հոկտեմբերին կոնֆերանսի համար, որի համար վճարել է թուրքական անշարժ գույքի առևտրային խումբը։
Հիշեցնենք, որ Նյու Յորքի քաղաքապետ Էրիկ Ադամսի նկատմամբ ավելի վաղ հետաքննություն էր սկսվել Թուրքիայի կառավարության հետ կոռուպցիոն գործարքների հետ կապված։
