Հեռացնե՛լ ՌԴ-ի զորքերը ՀՀ-ից, մենք կհսկենք մեր սահմանը․ այլապես մոռացեք ԵՄ-ի հետ ազատ վիզայի ռեժիմը․ Գուրգեն Սիմոնյան. ՏԵՍԱՆՅՈՒԹ

ԵՄ-ի խորհուրդը կայացրեց կարևոր որոշում՝ Հայաստանի հետ կսկսվեն վիզայի ազատականացման բանակցություններ, և եվրոպական պահանջները կատարելու դեպքում ՀՀ քաղաքացիները շենգենյան գոտի կճամփորդեն առանց վիզայի։ Բացի այդ ՀՀ-ին 10 միլիոն եվրոյի աջակցություն կտրվի Խաղաղության եվրոպական հիմնադրամից։ Այն կծախսվի դաշտային մոդուլային ճամբար ստեղծելու վրա՝ մեկ գումարտակի համար, կլինի նաև բժշկական օգնության ամբուլատորիա։

Իսկ ԱՄՆ պետքարտուղարության քաղաքացիական խորհրդատուն մտադիր է խորհրդատվական աջակցությունը սկսել առաջիկա ամիսներին։ Խորհրդատուն աջակցելու է Հայաստանի պաշտպանական հաստատությունների ամրապնդմանը։

«ԱՄՆ պետքարտուղարության Գլոբալ պաշտպանական բարեփոխումների ծրագիրն աշխարհով մեկ աջակցում է գործընկեր պետություններին առավել դիմակայուն, արդյունավետ ու հաշվետու անվտանգային հաստատությունների ձևավորման հարցում՝ ապահովելով ռազմավարական մակարդակի խորհրդատվական աջակցություն», – հայտնել է ԱՄՆ դեսպանատունը։

Քաղաքագետ Գուրգեն Սիմոնյանը Factor TV-ի հետ զրույցում ասում է, որ Արևմուտքը մուտք է գործել ռեգիոն, և ՀՀ-ն ուզենա-չուզենա՝ Արևմուտքի կարևորագույն գործընկեր է ճանաչված․

«Ֆրանսիայից զենք է գալիս Հայաստան, և եթե ՌԴ-ի ատամը կտրեր, գիտե՞ք ինչեր արած կլիներ մեր դեմ։ Սակայն այսօր ՌԴ-ն չկա ռեգիոնում, սպառնալիքը զրո է, արհեստականորեն են պահում նրանց։ Հայաստանի անկախացման գործընթացը «պերեխվատ» արվեց ՌԴ կողմից դեռ 1991-ին։ Հոկտեմբերի 27-ը վերջին ակորդն էր, երբ ՀՀ անկախության համար մարտնչողներին սպանեցին։ Ժամանակն է կառուցակարգենք անկախ պետականության հիմքերը»։

«Ժողովրդավարական ուժերի հարթակ»-ը երեկ հայտարարեց ԵՄ-ին անդամակցելու հարցով հանրաքվե նախաձեռնելու մտադրության մասին։ Ստորագրահավաք է սկսվում, որը կտևի մեկ ամսից ավելի, և կպահանջվի 50 հազար ստորագրություն՝ հանրաքվեի նշանակման հարցը ԱԺ օրակարգ մտցնելու համար։ Գուրգեն Սիմոնյանը չի միացել այս նախաձեռնությանը, ավելին՝ վտանգավոր է համարում հանրաքվեի անցկացումը, երբ ըստ նրա՝ հանրությունն արդեն իսկ համաձայն է եվրաինտեգրման գործընթացին․

«Չորս ուժերի հետ տարաձայնություն ունեմ, նրանք սատարում են Հայաստանի իշխանությանը, իսկ ես մտածում եմ՝ ներկայիս իշխանությունը պետք է փոխվի։ 6 տարում ի՞նչ ռեալ քայլի են գնացել, որ պաշտպանում եք։ ԵՄ-ին անդամակցելու հանրաքվեն վտանգավոր է, քանի որ ժողովուրդն արդեն որոշում ունի ԵՄ-ին անդամակցելու վերաբերյալ։ Նրա կարծիքը կարելի է հարցումների ձևով կազմել և ներկայացնել։ ՀՀ-ն միանգամից պիտի հայտ ներկայացնի՝ ԵՏՄ-ից դուրս գալով։ Անհնար է ԵՄ-ին անդամակցելու հայտ ներկայացնել՝ առանց ԵՏՄ-ից դուրս գալու․ նախ՝ ցանկապատերը ջարդեք, որ կարողանաք հաջորդիվ քայլերն անել։ Բացի այդ, ՌԴ-ի զորքերը ՀՀ-ից պիտի հեռացվեն, մենք պիտի հսկենք մեր սահմանները, այլապես՝ ԵՄ-ի հետ ազատ վիզայի ռեժիմը մոռացեք»,- ասաց Գուրգեն Սիմոնյանը։

Հարցազրույցն ամբողջությամբ՝ տեսանյութում։

Ռոբերտ Անանյան