ՀՀ կառավարությունը մտադիր է վարձակալությամբ տալ ԱՕԿՍ-ի շենքը։ Այդ նպատակով հայտարարվելու է մրցույթ։ Շենքը վարձակալությամբ է տրվելու 10 տարի ժամկետով։ Ըստ շրջանառվող նախագծի՝ գույքի ամսական նվազագույն վարձավճարը 15 մլն 450 հազար դրամ է լինելու։
Հիշեցնենք՝ 2023 թվականի սեպտեմբերի 9-ին ՀՀ գլխավոր դատախազությունը հայտարարեց, որ Հայաստանի պատմության և մշակույթի անշարժ հուշարձանների պետական ցանկում ընդգրկված Աբովյան 3 հասցեում գտնվող ԱՕԿՍ-ի շենքը վերադարձվում է Հայաստանի Հանրապետությանը։
Ավելի վաղ իրավապահ կառույցը տեղեկացրել էր, որ ԱՕԿՍ-ի շենքի գործով անցնում են մշակույթի նախկին նախարար, «Արտասահմանյան երկրների հետ մշակութային կապի և համագործակցության հայկական ընկերություն» հասարակական կազմակերպության փոխնախագահ Հասմիկ Պողոսյան, նրա հարսը ու Իսրայելում Հայաստանի նախկին դեսպան Արմեն Սմբատյանը։
Ըստ քրգործի՝ Հասմիկ Պողոսյանը չարաշահել է պաշտոնեական դիրքը, իսկ Արմեն Սմբատյանը նրան օժանդակել է։ Արդյունքում նրանք կարողացել են ՀՀ հողային օրենսգրքի սահմանափակումների ցանկում ընդգրկված պատմամշակութային արժեք ներկայացնող շենքի զբաղեցրած հողամասը դարձնել հասարակական կազմակերպության սեփականություն: Ապա, ըստ իրավապահների, շենքը և դրա զբաղեցրած հողամասը ձևական գործարքի արդյունքում՝ 550 հազար ԱՄՆ դոլարով վաճառել են օֆշորում՝ Բրիտանական Վիրջինյան կղզիներում գրանցված, Հասմիկ Պողոսյանի հարսին պատկանող ընկերությանը՝ «օրինականացնելով գույքը և թաքցնելով դրա ծագման աղբյուրը»։
Նարեկ Կիրակոսյան
