07.10.2026 | 15:26
«Ռոսատոմը» հաստատել է՝ հայկական ԱԷԿ-ը մինչև 2031 թվականը պատրաստ կլինի անվտանգ շահագործման
Բաքուն և Անկարան հույս ունեն, որ Իգդիր-Նախիջևան գազատարի նախագիծը կավարտվի 2024 թվականին
Քաղաքականություն
04.06.2024 | 22:31
Ադրբեջանի նախագահ Իլհամ Ալիևը հունիսի 4-ին ընդունել է Թուրքիայի էներգետիկայի և բնական պաշարների նախարար Ալփարսլան Բայրաքթարին։ Ադրբեջանական լրատվամիջոցների հաղորդմամբ՝ վերջինը ևս մեկ անգամ կարևորել է անցյալ տարի Նախիջևանում Ադրբեջանի և Թուրքիայի նախագահների մասնակցությամբ փոխըմբռնման հուշագրի ստորագրումը երկու երկրներում վերականգնվող էներգիայի աղբյուրներից արտադրվող էլեկտրաէներգիայի փոխանցման և Իգդիր-Նախիջևան գազատարի հիմնարկեքի վերաբերյալ։ Նա հույս է հայտնել, որ այս նախագիծը կավարտվի 2024 թվականին։
Ալիևն էլ գոհունակությամբ նշել է, որ Իգդիր-Նախիջևան գազատարի հիմնարկեքից հետո շուտով Նախիջևանում գազատարը պատրաստ կլինի։ Նա ասել է, որ այդ նախագիծը շատ կարևոր է էլեկտրաէներգիայի արտադրության և Նախիջևանի գազամատակարարման առումով։
Նշենք, որ դեռ 2020 թվականի դեկտեմբերին Թուրքիայի և Ադրբեջանի ԱԳ նախարարները հուշագիր էին ստորագրել Իգդիր-Նախիջևան գազատարի կառուցման վերաբերյալ, որն իրականացնում են Ադրբեջանի պետական նավթային SOCAR ու թուրքական պետական գազային BOTAŞ ընկերությունները։ Թուրքիայի տարածքում գազատարի երկարությունը կազմելու է մոտ 85 կմ։ Ըստ տարբեր տեղեկությունների՝ գազամուղի թողունակությունը 2 մլրդ մ³ է, որը 4 անգամ գերազանցում է Նախիջևանի պահանջարկը։
Նախիջևանն այս պահին իրանական գազ է ստանում 2004 թվականին Բաքվի ու Թեհրանի միջև կնքված փոխանակման համաձայնագրով, ըստ որի՝ Ադրբեջանը գազ է մատակարարում Իրանի Աստարա քաղաք, որն իրանական գազամատակարարման ցանցին միացած չէ։ Դրա դիմաց Իրանը գազ է մատակարարում Նախիջևանին ամբողջ ծավալի 85 տոկոսի չափով, իսկ 15 տոկոսը տարանցման վճարն է։
Բացի այդ, Թուրքիան իր հերթին գազ է ստանում Իրանից։ Իգդիր-Նախիջևան գազատարը Թուրքիան ցանկանում է օգտագործել Իրանի հետ բանակցություններում՝ տարբեր հարցերում իր համար ձեռնտու լուծումներ ստանալու համար։
Էմմա Չոբանյան
