11.08.2026 | 12:29
Այո՛, դատապարտում եմ․ Ջուլհակյանը՝ Հովիկ Աբրահամյանի որդու գործով ՔԿ հաղորդագրության մասին. ՏԵՍԱՆՅՈՒԹ
Վրաստանում մեկ օրով դադարեցվել են «օտարերկրյա գործակալների» մասին օրենքի դեմ բողոքի ակցիաները
Քաղաքականություն
17.05.2024 | 21:53
32 օր տևած ամենօրյա ցույցերից հետո Վրաստանում «օտարերկրյա գործակալների» մասին օրենքի հակառակորդները որոշել են ընդհատել բողոքի ակցիան մեկ օրով՝ մայիսի 17-ին՝ հոմոֆոբիայի դեմ պայքարի միջազգային օրվա կապակցությամբ: Այս որոշումը ցուցարարները կայացրել են՝ սադրանքներից խուսափելու համար։
Բանն այն է, որ տասը տարի առաջ Վրաստանի պատրիարքարանի նախաձեռնությամբ, որպես Հոմոֆոբիայի դեմ օրվան հակակշիռ, այս օրը երկրում սկսեցին նշել Ընտանիքի միասնության և սրբության օրը և կրոնական երթեր անցկացնել, գրում է VOA-ն։
«Օտարերկրյա գործակալների» մասին օրենքի հակառակորդները հայտարարել են, որ հակամարտության վտանգ կա ցուցարարների՝ հանրության հիմնականում լիբերալ հատվածի և մայիսի 17-ի միջոցառմանը մասնակցող պահպանողական մտածողությամբ քաղաքացիների միջև:
Միևնույն ժամանակ, Վրաստանի պատրիարքարանը կոչ է արել բոլոր քաղաքացիներին՝ «անկախ ազգությունից, հավատքից, քաղաքական դիրքից և տարիքից», միանալ երթին՝ «ցույց տալու, որ մեր պատմության, ավանդույթների, հոգևոր և մշակութային արժեքների պաշտպանությունը մեզ համար առաջնային նշանակություն ունի և վեր է նեղ քաղաքական շահերից»։
Երթին մասնակցել է նաև վարչապետ Իրակլի Կոբախիձեն, որը երկրի ժողովրդին շնորհավորել է Թբիլիսիի Սուրբ Երրորդության տաճարի տարածքից։
