11.08.2026 | 19:18
Ռուսական «ստվերային նավատորմի» լցանավի վրացի հրամանատարն ԱՄՆ-ում դատապարտվել է 10 ամսվա ազատազրկման
Ադրբեջանը վերսկսում է Իրանում իր դեսպանատան գործունեությունը․ նոր տարածք է տրամադրվել
Քաղաքականություն
17.05.2024 | 15:19
Թեհրանում Ադրբեջանի դեսպանատան վրա տեղի ունեցած զինված հարձակումից հետո Բաքուն պատրաստվում է վերսկսել դիվանագիտական ներկայացուցչության աշխատանքը։ Ադրբեջանի ԱԳՆ խոսնակ Այխան Հաջիզադեն հայտարարել է, որ հարձակումից հետո իրանական կողմի հետ բանակցությունների հիմնական ուղղություններից մեկը եղել է դեսպանատան անվտանգության հետ կապված լիարժեք երաշխիք տրամադրելու հարցը։
«Վերջին մի քանի ամիսների ընթացքում երկու երկրների պաշտոնյաների միջև շփումների և բանակցությունների շրջանակում իրանական կողմին են փոխանցվել մեր երկրի ակնկալիքները»,- ասել է նա։
Ըստ ադրբեջանցի պաշտոնյայի՝ քննարկվել է դեսպանատան տեղակայման նոր վայրի հարցը, որը կլինի ավելի անվտանգ և կհամապատասխանի դիվանագիտական առաքելության համար անհրաժեշտ պահանջներին։
«Արդյունքում որոշվել է դեսպանատան նոր վայրը։ Անհրաժեշտ աշխատանքների ավարտից հետո նախատեսվում է դեսպանության գործունեությունը վերսկսել նոր վայրում»,- ասել է Հաջիզադեն։
Հիշեցնենք, որ 2023 թվականի հունվարի 27-ին Իրանում Ադրբեջանի դեսպանատան վրա զինված հարձակման հետևանքով մեկ մարդ էր զոհվել, երկուսը՝ վիրավորվել։ Պաշտոնական Բաքուն դեսպանատան վրա իրականացված հարձակումն «ահաբեկչություն» էր որակել։ Միջադեպից հետո Բաքուն տարհանել էր Թեհրանում Ադրբեջանի դեսպանատան աշխատակիցներին։ Մինչ օրս դեսպանատան գործունեությունը դադարեցված է։
