24.06.2026 | 23:56
Հրդեհ Վարդաշեն 6-րդ փողոցի շենքերից մեկում. մեկ անձ դիմել է բուժօգնության, տարհանվել է 12 քաղաքացի
Սլովակիայում հայտնել են մահափորձից հետո վարչապետի առողջական վիճակի մասին
Քաղաքականություն
15.05.2024 | 19:24
Սլովակիայի վարչապետ Ռոբերտ Ֆիցոն իր դեմ մահափորձի հետևանքով վիրավորվել է որովայնի ու ձեռքի հատվածում։ BBC-ի ռուսական ծառայության փոխանցմամբ՝ մահափորձից երկու ժամ անց Ֆիցոյի ֆեյսբուքյան պաշտոնական էջում հաղորդագրություն է հայտնվել այն մասին, որ նրա ստացած վնասվածքները կյանքին վտանգ են սպառնում։
Մինչ այդ, սակայն, սլովակյան պարբերականները, հղում անելով անանուն աղբյուրներին, գրել էին, որ Ֆիցոյի կյանքին վտանգ չի սպառնում։
Ռոբերտ Ֆիցոյին տեղափոխող փրկարարական ուղղաթիռը վայրէջք է կատարել Բանսկա Բիստրիցայի F.D. Faculty Hospital-ում: Reuters-ը հայտնել է, որ վարչապետն ուշագնաց է եղել բժշկական հաստատություն ժամանելուն պես։ Օգնություն ստանալուց հետո նրա վիճակը կայունացել է։
Ռոբերտ Ֆիցոն վիրավորվել էր հրաձգության ժամանակ, որը սկսվել էր Հանդլովայում երկրի կառավարության արտագնա նիստից հետո։ Ըստ ականատեսների՝ Ֆիցոն մոտեցել է իրեն սպասողներին, երբ ինչ-որ մեկը բարձր բղավել է՝ «Ռոբո՛, արի այստեղ»։ Հետո կրակոցներ են հնչել և վարչապետն ընկել է։
