Էրդողանը ԵՄ-ին կոչ է արել «փակուղի» չմտցնել Անկարայի հետ հարաբերությունները

ԵՄ երկրները պետք է ձեռնպահ մնան Անկարայի և Բրյուսելի միջև հարաբերությունների զարգացմանը խոչընդոտող քաղաքականությունից։ Այս մասին հայտարարել է Թուրքիայի նախագահ Ռեջեփ Թայիփ Էրդողանը մայիսի 9-ին նշվող Եվրոպայի օրվա կապակցությամբ իր ուղերձում։

«Չափազանց կարևոր է, որ ԵՄ-ն Թուրքիայի հետ հարաբերությունները կառուցի արդար և արդյունավետ մոտեցման հիման վրա՝ խուսափելով մեր հարաբերությունները փակուղի տանող քաղաքականությունից և քննարկումներից»,- ասել է Թուրքիայի նախագահը։

Նա նաև նախազգուշացրել է, որ Անկարայի նկատմամբ Բրյուսելի «բացառման քաղաքականության» դեպքում, որը բացասաբար է անդրադառնում նաև ԵՄ-ի վրա, Թուրքիան «չի վարանի օգտագործել իր ռազմավարական հնարավորություններն ու ներուժը»։ Էրդողանը նշել է, որ  մի շարք եվրոպական կառույցների և երկրների վարած քաղաքականությունը Գազայի հատվածի ճգնաժամի ֆոնին «կոտրել են հավատը եվրոպական արժեքների նկատմամբ»։ Նա նաև ասել է, թե «Եվրոպայի երկրներում իսլամատյացությունը, այլատյացությունն ու ռասիզմը ամենասուր խնդիրներից են էթնիկ թուրքերի և այլ միգրանտների համար»։

«Ներկայիս կրիտիկական փուլում, երբ մեծացել է ընդլայնման քաղաքականության թափը, ժամանակն է, որ Թուրքիան և ԵՄ-ն ընդլայնեն համագործակցությունը բոլոր ոլորտներում, ներառյալ անդամակցության բանակցությունները, որոնք մեր հարաբերությունների հիմքն են և այն ավելի ամուր հիմքերի վրա կդնեն»,- ասել է Թուրքիայի նախագահը։

Եվրոպական խորհուրդը ռազմավարական քննարկում էր ապրիլի կեսերին անցկացրել ԵՄ-Թուրքիա հարաբերությունների վերաբերյալ՝ ի գիտություն ընդունելով ԵՄ դիվանագիտության ղեկավար Ժոզեպ Բորելի և հանձնաժողովի համատեղ հաղորդագրությունը ԵՄ-Թուրքիա քաղաքական, տնտեսական և առևտրային հարաբերությունների վիճակի վերաբերյալ։

Նիստի արդյունքներով տարածված հայտարարության մեջ ԵՄ-Թուրքիա համագործակցությունն է՛լ ավելի ընդլայնելու նպատակով ԵՄ ղեկավարներն ընդգծել էին Կիպրոսի խնդրի կարգավորման հարցով բանակցությունների վերսկսման և առաջընթացի կարևորությունը։

Էմմա Չոբանյան