Թուրքիան ԱՄՆ-ի հետ հեղուկ բնական գազի գնման երկարաժամկետ էներգետիկ համաձայնագիր է կնքել

Թուրքական պետական BOTAŞ-ի և ամերիկյան էներգետիկ հսկա ExxonMobil-ի միջև կնքված նոր համաձայնագրով ԱՄՆ-ից հեղուկացված բնական գազը ձեռք կբերվի երկարաժամկետ մատչելի գնով։ Թուրքիայի Էներգետիկայի և բնական պաշարների նախարար Ալփարսլան Բայրաքթարը TRT Haber-ին տված հարցազրույցում խոսել է համաձայնագրի մանրամասներից։

«Սա կարևոր է Թուրքիայի գազամատակարարման դիվերսիֆիկացման համար։ Հուսով եմ, որ այն, ինչի մասին մենք այսօր խոսում ենք, բավական մեծ համաձայնագիր է, որպեսզի բավարարի այսօրվա Թուրքիայի կարիքների 8 տոկոսը»,- ասել է նա՝ նշելով, որ մեծ միջուկային ռեակտորների ուսումնասիրությունները շարունակվում են, և հնարավորություն կա համագործակցել ԱՄՆ-ի հետ փոքր մոդուլային ռեակտորների շուրջ, որոնք թույլ են տալիս էներգիայի փոխակերպում արդյունաբերության մեջ։

Ավելի վաղ Financial Times-ի հետ զրույցում Բայրաքթարն ասել էր, որ Թուրքիան բանակցություններ է վարում ամերիկյան ExxonMobil-ի հետ հեղուկ բնական գազի գնման բազմամիլիարդանոց գործարքի շուրջ՝ փորձելով զսպել իր կախվածությունը ռուսական էներգակիրներից։ Նա ասել էր, որ երկիրը ձգտում է կառուցել «մատակարարման նոր պորտֆել», որը նրան կդարձնի ավելի պակաս կախված որևէ գործընկերոջից։ Պաշտոնյան ընդգծել էր, որ Թուրքիան տարեկան կստանա մինչև 2,5 միլիոն տոննա հեղուկ բնական գազ Exxon-ի հետ քննարկվող երկարաժամկետ համաձայնագրի շրջանակում։

Թուրքիան նավթի և գազի առումով մեծապես կախված է Ռուսաստանից, Ադրբեջանից և Իրանից, ինչպես նաև Ալժիրից, Կատարից, ԱՄՆ-ից և Նիգերիայից հեղուկ գազի ներկրումներից:

Էմմա Չոբանյան