Բայդենը սպառնացել է դադարեցնել Իսրայելին որոշ զինատեսակների մատակարարումը

ԱՄՆ նախագահ Ջո Բայդենը սպառնացել է դադարեցնել որոշ զինատեսակների մատակարարումն Իսրայելին, եթե վերջինը ռազմական գործողություն սկսի Գազայի հարավում գտնվող Ռաֆահ քաղաքում, գրում է DW-ի ռուսական ծառայությունը։

«Ես հստակ հասկացրել եմ՝ եթե իսրայելցիները մտնեն Ռաֆահ, ինչը դեռ չեն արել, ապա ես նրանց զենք չեմ մատակարարի, որը նրանք օգտագործել են նման գործողությունների համար»,- ասել է Բայդենը CNN-ին տված հարցազրույցում։

ԱՄՆ նախագահը շեշտել է, որ Ռաֆահի գործողությունն «ուղղակի սխալ է»։

«Մենք չենք պատրաստվում դրա համար զենք և հրետանային զինամթերք տրամադրել»,- ընդգծել է Բայդենը։

Նա, միաժամանակ, վստահեցրել է, որ ԱՄՆ-ն կշարունակի Իսրայելին մատակարարել այն ամենը, ինչ անհրաժեշտ է պաշտպանական կարողությունները պահպանելու, մասնավորապես՝ «Երկաթե գմբեթ» ՀՕՊ համակարգի համար։

«Մենք չենք հրաժարվում Իսրայելի անվտանգության ապահովումից։ Սակայն մենք հրաժարվում ենք աջակցել նրա կարողությանը պատերազմ մղելու նման շրջաններում»,- նշել է Բայդենը։

Ավելի վաղ հայտնի էր դարձել, որ ԱՄՆ-ը հետաձգել է 907 կգ քաշով 1800 ռումբերի և 226 կիլոգրամ քաշով 1700 ռումբի մատակարարումն Իսրայելին։ CNN-ին տված հարցազրույցում Բայդենն ասել է, որ Գազայի հատվածում նման ռումբերի կիրառման հետևանքով խաղաղ բնակիչներ են զոհվել։ ԱՄՆ նախագահը մտավախություն ունի, որ Իսրայելի  բանակը կարող է օգտագործել այդ ռումբերը Ռաֆահի վրա հարձակվելիս, գրում է The New York Times-ը՝ հղում անելով աղբյուրներին։ Ըստ պարբերականի՝ Վաշինգտոնը դիտարկում է նաև Իսրայելին նման ռումբերի ուղղորդման համակարգերի մատակարարումը դադարեցնելու հարցը։

CNN-ը հայտնում է, որ Բայդենը գտնվում է իր կուսակից դեմոկրատների ուժեղ ճնշման տակ, որոնք պահանջում են սահմանափակել Իսրայելին զենքի մատակարարումները և մատնանշում Գազայի հատվածում ծագած մարդասիրական ճգնաժամը։