10.12.2025 | 21:28
Կրոնական ազատությունը Հայաստանում ժողովրդավարության կարևոր բաղադրիչներից է։
Էրդողանը հայտարարել է, թե ՀՀ-ի և Ադրբեջանի միջև խաղաղության համաձայնագիրը պետք է հնարավորինս շուտ ստորագրվի
Քաղաքականություն
09.05.2024 | 12:46
Թուրքիայի նախագահ Ռեջեփ Թայիփ Էրդողանն Ադրբեջանի վարչապետ Ալի Ասադովի հետ հանդիպմանը քննարկվել են երկկողմ հարաբերությունները, Ադրբեջանի և Հայաստանի միջև խաղաղ բանակցությունները, Իսրայելի հարձակումները Գազայի վրա, տարածաշրջանում իրավիճակը, տարածաշրջանային և գլոբալ զարգացումները:
«Մայիսի 10-ին Ալմաթիում կայանալիք հանդիպումից դրական արդյունքի ակնկալիք հայտնելով՝ նախագահ Էրդողանը հայտարարել է, որ Հայաստանի և Ադրբեջանի միջև խաղաղության գործընթացում ձեռք բերված առաջընթացը բավարար է, և որ խաղաղության համաձայնագիրը պետք է հնարավորինս շուտ ստորագրվի, որպեսզի տարածաշրջանը հասնի այն կայունությանը, որին ձգտում է»,- ասվում է թուրքական կողմի տարածած հաղորդագրությունում։
Էրդողանը նշել է, թե «Թուրքիան և Ադրբեջանը կպահպանեն սերտ համագործակցությունը՝ կանխելու միակողմանի և կանխակալ արտաքին միջամտությունները տարածաշրջանն աշխարհաքաղաքական հակամարտության գոտու վերածելու համար, նաև հայտարարել, որ Թուրքիայի համակողմանի աջակցությունը եղբայրական Ադրբեջանին շարունակվելու է»։
Անդրադառնալով Իսրայելին՝ Թուրքիայի նախագահն ասել է, որ այն ձգտում է տարածել պատերազմը տարածաշրջանում, և թեև ՀԱՄԱՍ-ն ընդունել է հրադադարը, Իսրայելը շարունակում է հարձակումները։ Նա հայտարարել է, որ Թյուրքական պետությունների կազմակերպությունը կարող է հետագա համագործակցություն ծավալել Գազայի խաղաղ բնակիչներին մարդասիրական օգնություն հասցնելու համար։
