Ռուսական բանակը հրթիռներով ու «Շահեդ»-ներով զանգվածային հարվածներ է հասցրել Ուկրաինային

Մայիսի 7-ի լույս 8-ի գիշերը ռուս զինվորականները հրթիռներով և անօդաչու թռչող սարքերով հարվածներ են հասցրել Ուկրաինային, ամբողջ երկրում օդային հարձակումների տագնապ է հայտարարվել։ Պայթյուններ են լսվել Կիևում, Խարկովում, Պոլտավայում և Լվովում, հայտնում են տեղական լրատվամիջոցները։

Կիևի քաղաքային ռազմական վարչակազմի ղեկավար Սերգեյ Պոպկոն հայտնել է, որ խոցվել են մայրաքաղաքի ուղղությամբ թռչող բոլոր հրթիռներն ու անօդաչու սարքերը։ Ըստ նրա՝ ռուս զինվորականները, մասնավորապես, X-101/X-555/X-55 թևավոր հրթիռներով հարվածներ են հասցրել Տու-95ՄՍ ռազմավարական ռմբակոծիչներից։ Դրանք տարբեր ուղղություններից են մոտեցել Կիևին, պարզաբանել է Պոպկոն։

Կիևում օդային հարձակման տագնապը տևել է ավելի քան երեք ժամ։ Մայրաքաղաքում, նախնական տվյալներով, զոհեր և ավերածություններ չկան։

Լվովի քաղաքապետը նույնպես հայտնել է տարածաշրջանին հրթիռների հարվածի մասին, իսկ ավելի ուշ գրել է հակաօդային պաշտպանության աշխատանքի մասին։

Պոլտավայի շրջանի վարչակազմի ղեկավար Ֆիլիպ Պրոնինը հայտնել է, որ Պոլտավայի շրջանում անօդաչու թռչող սարքը հարվածել է էներգետիկ ենթակառուցվածքի օբյեկտի, ինչի հետևանքով այնտեղ հրդեհ է բռնկվել։ Ըստ նախնական տեղեկությունների՝ զոհեր և վիրավորներ չկան։

Զապորոժիեի շրջանի վարչակազմի ղեկավար Իվան Ֆյոդորովը գրել է, որ շրջանում հարվածների թիրախ են դարձել էներգետիկ օբյեկտները և կարևոր ենթակառուցվածքները։ Նրա խոսքով՝ ավերածություններ են եղել, սակայն զոհեր չկան։

Կիրովոգրադի շրջանի վարչակազմի ղեկավար Անդրեյ Ռայկովիչը հայտնել 8-ամյա երեխայի տուժելու, ինչպես նաև տարածաշրջանում «կրիտիկական ենթակառուցվածքի» վնասվելու մասին։

Ուկրաինայի էներգետիկայի նախարար Գերման Գալուշչենկոն հայտարարել է, որ մայիսի 8-ի գիշերը ռուսական հրթիռներն ու անօդաչու թռչող սարքերը հարվածել են վեց շրջանների էներգետիկ օբյեկտներին։

«Կրկին հարձակում մեր էներգետիկ ենթակառուցվածքին։ Պոլտավայում, Կիրովոգրադում, Զապորոժիեում, Լվովում, Իվանո-Ֆրանկովսկում և Վիննիցայի շրջաններում հարձակման են ենթարկվել էլեկտրաէներգիայի գեներացման ու փոխանցման օբյեկտները»,- նշել է Գալուշչենկոն:

Ներկայում Ուկրաինայում օդային տագնապը չեղարկված է։