Իսրայելական բանակը սկսել է բնակիչների տարհանումը Ռաֆահից

Գազայի հատվածի Ռաֆահում ռազմական գործողության նախապատրաստման ֆոնին Իսրայելը սկսել է բնակչության տարհանումը քաղաքից։ Իսրայելցի զինվորականները մայիսի 6-ին կոչ են արել արևելյան Ռաֆահի բնակիչներին, որը գտնվում է Եգիպտոսի հետ սահմանին, տեղափոխվել «ընդլայնված մարդասիրական տարածք»՝ Ալ-Մավազի ճամբար, որը գտնվում է մի քանի կիլոմետր դեպի հյուսիս՝ Միջերկրական ծովի ափին, գրում է DW-ի ռուսական ծառայությունը:

Իսրայելական բանակը հայտնել է, որ Ռաֆահի բնակիչներին իրազեկում է տարհանման մասին պաստառների, տեքստային հաղորդագրությունների, հեռախոսազանգերի և արաբերեն լրատվամիջոցների հաղորդագրությունների միջոցով:

«Այսօր առավոտյան մենք գործողություն ենք սկսել՝ արևելյան Ռաֆահի բնակիչներին ժամանակավորապես տարհանելու համար»,- առցանց մամուլի ասուլիսում ասել է իսրայելական բանակի ներկայացուցիչը՝ հավելելով, որ տարհանումն ընդգրկում է շուրջ 100,000 մարդու:

Կահիրեում Իսրայելի և պաղեստինյան ​​արմատական ​​ՀԱՄԱՍ շարժման միջև անուղղակի բանակցությունները՝ հրադադարի և պաղեստինցի բանտարկյալների դիմաց պատանդների ազատ արձակման շուրջ, ավարտվել են անհաջողությամբ։

Ռաֆահում շուրջ 1,2 միլիոն պաղեստինցիներ են ապաստանել իսրայելական բանակի և ՀԱՄԱՍ-ի միջև մարտերից մեկնարկից հետո։ Իսրայելի կառավարությունը Ռաֆահը համարում է Պաղեստինում ՀԱՄԱՍ-ի վերջին հենակետը և մտադիր է ոչնչացնել մնացած զինյալ խմբավորումներին։ Ենթադրվում է, որ իսրայելցի պատանդներ կան նաև Ռաֆահում:

Դաշնակիցներն ամիսներ շարունակ զգուշացնում են Իսրայելին զերծ մնալ Ռաֆահում ռազմական գործողություններից՝ վախենալով մեծաթիվ քաղաքացիական զոհերից, սակայն Իսրայելը հարձակումը կարևոր է համարում ՀԱՄԱՍ-ի ռազմական հնարավորությունները ջախջախելու համար՝ ընդգծելով, որ հակառակ դեպքում խմբավորումը միայն կուժեղանա պատերազմից հետո:

Նախօրեին ՀԱՄԱՍ-ի զինյալները հրթիռակոծել էին Իսրայելի սահմանային Քերեմ Շալոմ անցակետը, ինչի հետևանքով երեք իսրայելցի զինվոր է զոհվել: Քերեմ Շալոմն ամենակարևոր սահմանային անցակետն է Իսրայելից Գազայի հատված մարդասիրական օգնության մատակարարման համար։ Հարձակումից հետո Իսրայելը փակել է այն մարդասիրական տրանսպորտի համար և պատասխան հարվածներ հասցրել Ռաֆահի մերձակայքում գտնվող բնակավայրին, որտեղից, ենթադրաբար, արձակվել են հրթիռները։ Հաղորդվում է, որ զոհվել է 9 պաղեստինցի: