07.10.2026 | 18:38
Թուրքիայի 3-րդ խոշորագույն քաղաքի ընդդիմադիր քաղաքապետը միացել է Էրդողանի ղեկավարած ուժին
ՌԴ ՊՆ-ն հայտարարել է մարտավարական միջուկային զենքով վարժանքների մասին՝ ի պատասխան Արևմուտքի «սադրիչ հայտարարությունների և սպառնալիքների»
Քաղաքականություն
06.05.2024 | 13:46
ՌԴ ՊՆ գլխավոր շտաբը, նախագահ Վլադիմիր Պուտինի հանձնարարությամբ, սկսել է վարժանքների նախապատրաստումը, որպեսզի «բարձրացնի ոչ ռազմավարական միջուկային ուժերի պատրաստվածությունը մարտական առաջադրանքներ կատարելու համար», հաղորդում է գերատեսչությունը։
Զորավարժությունների ընթացքում Պաշտպանության նախարարությունը նախատեսում է մշակել «ոչ ռազմավարական միջուկային զենքի պատրաստման և կիրառման» (նաև՝ մարտավարական) խնդիրները՝ «անվերապահորեն ապահովելու Ռուսաստանի տարածքային ամբողջականությունն ու ինքնիշխանությունը՝ ի պատասխան ՌԴ-ի դեմ արևմտյան առանձին պաշտոնյաների սադրիչ գործողությունների, հայտարարությունների ու սպառնալիքների»։
Նշվում է, որ զորավարժությունները կանցկացվեն «շուտով»: Դրանց կմասնակցեն Հարավային ռազմական օկրուգի հրթիռային կազմավորումները՝ ավիացիայի, ինչպես նաև ռազմածովային ուժերի մասնակցությամբ։ Զորավարժությունների անցկացման վայրը չի հաղորդվում։
2024 թվականի փետրվարի վերջին Financial Times-ը հայտնել էր ռուսական մարտավարական միջուկային զենքի հետ կապված գաղտնի փաստաթղթերի ստացման մասին։ Ըստ հրապարակման՝ դրանցում ասվում է, որ Ռուսաստանի կողմից դրա օգտագործման հավանականության շեմն ավելի ցածր է, քան այն, ինչ պաշտոնապես հայտարարում են Ռուսաստանի իշխանությունները։
