ՌԴ-ն անվտանգության ապահովման գործում կարևոր դերակատարում ունի ոչ միայն տարածաշրջանում, այլև ավելի լայն տարածքում․ Ալիևը՝ ՌԴ Պետդումայի անդամներին

Ադրբեջանի նախագահ Իլհամ Ալիևը մայիսի 2-ին ընդունել է ՌԴ Դաշնային խորհրդի նախագահի տեղակալ Կոնստանտին Կոսաչևին և Պետդումայի ԱՊՀ գործերով, Եվրասիական ինտեգրման և հայրենակիցների հետ կապերի  հանձնաժողովի նախագահ Լեոնիդ Կալաշնիկովին։ Ադրբեջանի նախագահականի հաղորդմամբ՝ Կոսաչևն ասել է, որ Միջմշակութային երկխոսության VI համաշխարհային ֆորումը բարձր մակարդակով է անցել, կարևորել է համաժողովում Ալիևը «խորը ելույթը» և հայտարարել, որ նրա տեսակետներն «Ադրբեջանի տարածքային ամբողջականության վերականգնման, Չմիավորման շարժման գործունեության, նեոգաղութատիրության և այլ թեմաների վերաբերյալ շատ արդիական են ժամանակակից պայմաններում»։

Նա նշել է, որ Իլհամ Ալիևի վերջին այցը Մոսկվա շատ հաջող է անցել։

Խոսելով ապրիլի 22-ին Մոսկվա կատարած այցի մասին՝ Ալիևն ընդգծել է, որ այցը շատ արդյունավետ էր ու ևս մեկ անգամ ցույց է տվել երկու երկրների դաշնակցային հարաբերությունների ռազմավարական բնույթը։

«Նախագահ Ալիևն ընդգծել է, որ Ադրբեջանը և Ռուսաստանը, որպես երկու հարևան պետություններ, ցուցաբերում են առավելագույն փոխադարձ աջակցություն, հարգանք և համագործակցություն երկկողմ ու բազմակողմ խնդիրների լուծման գործում։ Ադրբեջանի նախագահը նշել է, որ Ռուսաստանը կարևոր դեր է խաղում ոչ միայն տարածաշրջանում, այլև ավելի լայն տարածքում անվտանգության ապահովման գործում։ Իլհամ Ալիևն ասել է, որ մեր երկկողմ հարաբերությունները զարգանում են անընդհատ աճող գծով, և դա գնահատել է որպես Հարավային Կովկասի և ավելի լայն աշխարհագրության տարածաշրջանային զարգացման կարևոր գործոն»,- ասվում է հաղորդագրության մեջ։