ՌԴ-ն Տաջիկստանից հետո զանգվածաբար արգելում է Ուզբեկստանի և Ղրղզստանի քաղաքացիների մուտքը երկիր

Ռուս սահմանապահները սկսել են զանգվածաբար արգելել Ուզբեկստանի և Ղրղզստանի քաղաքացիների մուտքը երկիր։ Սա խնդիր է, որին օտարերկրացիները բախվում են վերջին շրջանում օդանավակայաններում և ցամաքային անցակետերում, գրում է «Ագենստվոն»՝ վկայակոչելով իրավապաշտպան Վալենտինա Չուպիկին։

Նախկինում ՌԴ իշխանությունները զանգվածաբար երկիր չէին թողնում միայն Տաջիկստանի քաղաքացիներին։

Չուպիկն ասում է, որ երկիր մուտք գործելիս միգրանտների կալանավորումը սկսվել է ապրիլի 24-ին, իսկ մայիսի 1-ին մոտ 4500 մարդ է կուտակվել ՌԴ օդանավակայաններում, նույնքան մարդու թույլ չեն տվել մտնել երկիր ցամաքային անցակետերով։ Նա նշում է, որ Ռուսաստանը երբեք չի մերժել օտարերկրացիների մուտքը երկիր նման մասշտաբներով։

Այժմ Տաջիկստանի քաղաքացիները կազմում են ձերբակալվածների ընդհանուր թվի մեկ քառորդը, ձերբակալվածների մոտավորապես կեսը Ուզբեկստանից միգրանտներ են, մնացածը՝ հիմնականում Ղրղզստանի քաղաքացիներ։

Չուպիկի խոսքով՝ ապրիլի 24-ից միգրանտներն իրեն մոտ երկու հարյուր նամակ են գրել, որտեղ բողոքել են, որ իրենց ջուր և սնունդ չեն տալիս, թույլ չեն տալիս զուգարան գնալ, հեռախոսները խլել են՝ առանց որևէ բացատրություն տալու: Շատ քաղաքացիներ հետ են ուղարկվում մեկ կամ երկու օրվա ընթացքում, բայց երբեմն գործընթացը կարող է ձգձգվել մինչև մեկ շաբաթ:

Ուզբեկստանի և Ղրղզստանի ԱԳ նախարարությունները դեռևս չեն մեկնաբանել ստեղծված իրավիճակը։

Ապրիլի 27-ին Տաջիկստանի ԱԳՆ-ն դիմել էր երկրի քաղաքացիներին՝ խորհուրդ տալով զերծ մնալ Ռուսաստան մեկնելուց, եթե խիստ անհրաժեշտություն չկա: Մինչ այս, հայտարարվել էր Տաջիկստանի քաղաքացիներին Ռուսաստանի Դաշնության տարածք մուտք գործելու «անհիմն մերժումների» կտրուկ աճի մասին։ ԱԳՆ-ն մտահոգություն է հայտնել նման դեպքերի կապակցությամբ, որոնք «համատարած են դարձել»։

Ապրիլի 28-ին Տաջիկստանի արտաքին գործերի նախարարությունը հայտարարեց, որ Ռուսաստանի իշխանությունները Մոսկվայի օդանավակայաններում պահում են երկրի հազարից ավելի քաղաքացիների։

«Արգելափակված քաղաքացիների թվում կան տաջիկ ուսանողներ, որոնք սովորում են Ռուսաստանում՝ Ռուսաստանի կառավարության կրթական քվոտաների հաշվին», – նշել են գերատեսչությունում։

Ապրիլի 29-ին Տաջիկստանի ԱԳՆ-ն բողոքի նոտա ներկայացրեց ՌԴ դեսպան Սեմյոն Գրիգորիևին՝ Ռուսաստանում հանրապետության քաղաքացիների «իրավունքների և ազատությունների համատարած ոտնահարման» կապակցությամբ։