ԵԽԽՎ-ն մտահոգված է Ադրբեջանում հայտնի իրավապաշտպանի կալանավորման կապակցությամբ

Եվրոպայի խորհրդի Խորհրդարանական վեհաժողովի (ԵԽԽՎ) Ադրբեջանի հարցով զեկուցողները խորը մտահոգություն են հայտնել հայտնի իրավապաշտպան Անար Մամեդլիի ձերբակալության կապակցությամբ։

«Մենք կոչ ենք անում Ադրբեջանի իշխանություններին անհապաղ վերանայել այս գործը և ապահովել, որ Անար Մամեդլին քրեական պատասխանատվության չենթարկվի մարդու իրավունքների ոլորտում իր արժեքավոր աշխատանքի համար»,-ասվում է ԵԽԽՎ Ադրբեջանի հարցով համազեկուցողներ Լիզ Քրիստոֆերսենի, Յան Լիդել-Գրեյջերի, ինչպես նաև «Ադրբեջանում լրագրողների և իրավապաշտպանների կյանքին և անվտանգությանը սպառնացող վտանգները» հարցով զեկուցող Հաննա Բարդելի համատեղ հայտարարության մեջ։

Նրանք նշում են, որ Վացլավ Հավելի մրցանակի դափնեկիր Անար Մամեդլին հետապնդվում է կեղծ մեղադրանքներով՝ մարդու իրավունքների ոլորտում իր գործունեության պատճառով։

«Մենք խորապես մտահոգված ենք, որ Մամեդլին կրկին ձերբակալվել է։ Նրա փաստաբանն ասաց, որ կալանավորումը կապված է Abzas Media-ի մի քանի լրագրողների դեմ գործի հետ, որը դիտարկվում է քաղաքականապես մոտիվացված անկախ քաղաքացիական հասարակության կողմից»,- ասվում է հայտարարության մեջ։

Մամեդլին ձերբակալվել է ապրիլի 29-ին։ Ադրբեջանական լրատվամիջոցներին հարազատները հայտնել են, որ նրան մեղադրանք է առաջադրվել մաքսանենգության համար՝ ՔՕ-ի 206.3.2 հոդվածով (մաքսանենգություն մի խումբ անձանց կողմից դավադրության միջոցով)։ Մամեդլիի քրոջ խոսքով՝ խուզարկությունն ավարտելուց հետո ոստիկանները բնակարանում թողել են հատուկ ժապավեն, որն օգտագործվում է փող փաթաթելու համար։ Նա ենթադրում է, որ ոստիկանությունն է եղբոր բնակարանում դրել գումարը, հետո «գտել»՝ Մամեդլիին մաքսանենգության մեջ մեղադրելու համար։ Ավելի վաղ Մամեդլիի հարազատները հայտնել էին, որ Մամեդլիին քննում են Abzas Media-ի գործով։ Նա այս գործով անցնող արդեն 8-րդ մեղադրյալն է։

Ապրիլի 30-ին Խաթայի շրջանային դատարանը որոշում է կայացրել 3 ամիս 28 օրով կալանավորել Մամեդլիին։

Պաշտպանական կողմը դատարանի որոշումը համարում է անօրինական, քանի որ Մամեդլիին քրեական պատասխանատվության ենթարկելու և նրան կալանքի տակ դնելու հիմքեր չկան։ Ինքը՝ Անար Մամեդլին, հերքում է մեղադրանքները՝ դրանք անվանելով անհիմն և քաղաքական պատվեր։

Հավելենք, որ 2013 թվականին Մամեդլին կալանավորվել և դատապարտվել էր ազատազրկման՝ տնտեսական հանցագործություններ կատարելու մեղադրանքով։ Նա ճանաչվել էր քաղբանտարկյալ, 2016 թվականին ազատ էր արձակվել համաներմամբ։ Եվրոպական դատարանը որոշել է, որ նրա գործը քաղաքական դրդապատճառներ ունի։

Էմմա Չոբանյան