21.06.2026 | 14:12
Ղրիմում բենզինի վաճառքն ամբողջությամբ դադարեցվել է
ԵՄ-ն դատապարտել է Վրաստանում ցուցարարների նկատմամբ բռնությունները
Քաղաքականություն
01.05.2024 | 16:19
Եվրամիության արտաքին գործերի և անվտանգության քաղաքականության բարձր ներկայացուցիչ Ժոզեպ Բորելը խստորեն դատապարտել է վրացական իշխանությունների բռնությունը Թբիլիսիում ցուցարարների նկատմամբ, որոնք քննադատում են երկրի կառավարությունը՝ կապված «Արտաքին ազդեցության թափանցիկության մասին» օրինագծի հետ, գրում է DW-ի ռուսական ծառայությունը։
«Վրաստանը հանդիսանում է ԵՄ անդամակցության թեկնածու, և ես կոչ եմ անում նրա իշխանություններին՝ ապահովել խաղաղ հավաքների իրավունքը։ Նրանց ճնշելու համար ուժի կիրառումն անընդունելի է»,- գրել է Բորելը X-ի իր միկրոբլոգում։
Նշենք, որ Թբիլիսիում գիշերը ոստիկանությունը ձերբակալել է ցույցերի 63 մասնակցի։
Ցուցարարները բարիկադներ են տեղադրել խորհրդարանի մոտակայքում։ Հատուկ ջոկատայինները բերման են ենթարկել մարդկանց, կիրառել ջրցան մեքենաներ և արցունքաբեր գազ։ Ցուցարարները ցրվել են, կարճ ժամանակ անց՝ կրկին վերադարձել։ Ռուսթավելի պողոտայում գիշերը մի քանի հազար մարդ է մնացել։
Առավոտյան ոստիկանությունը դադարեցրել է ցուցարարներին ցրելու փորձերը և կենտրոնացել խորհրդարանի մուտքերի պահպանության վրա: Մնացած ցուցարարները զբաղեցրել են շենքի դիմացի տարածքը, բարիկադներով բաժանվել հատուկ ջոկատայիններից։
