07.10.2026 | 11:12
«Արմավիր» ՔԿՀ-ում դրոնով 6 բջջային հեռախոս է փորձ արվել փոխանցել
Բաքուն արշավ է սկսել Ալիևին ոչ լեգիտիմ նախագահ անվանած ԵԽԽՎ պատգամավորի դեմ
Քաղաքականություն
01.05.2024 | 17:45
Բաքուն շարունակում է ԵԽԽՎ գերմանացի պատգամավոր Ֆրանկ Շվաբեի դեմ արշավը, որը նախօրեին անդրադարձել էր Ադրբեջանի իշխանությունների կողմից Ընտրությունների մոնիթորինգի և ժողովրդավարության ուսուցման կենտրոնի ղեկավար, իրավապաշտպան Անար Մամեդլիի ձերբակալությանը։
«Ադրբեջանի ոչ լեգիտիմ նախագահ Ալիևի շուրջ ձևավորված հանցավոր խումբը համարձակվել է բանտարկել Եվրոպայի խորհրդի Վացլավ Հավելի Մարդու իրավունքների մրցանակի դափնեկիր Անար Մամեդլիին։ Ադրբեջանը Եվրոպայի խորհրդի Խորհրդարանական վեհաժողով վերադառնալու ճանապարհ չունի՝ ո՛չ հիմա, ո՛չ հունվարին»,- գրել էր նա X-ի իր միկրոբլոգում։
Շվաբեին արձագանքել է Ադրբեջանի Մեջլիսի պատգամավոր, ԵԵԽՎ-ում ադրբեջանական պատվիրակության անփոփոխ ղեկավար Սամեդ Սեիդովը՝ գերմանացի պատգամավորին անվանելով «քաղաքական ահաբեկիչ»։
«Շվաբեն բացահայտել է իր իրական դեմքը։ Նա վարձկան քաղաքական գործիչ է, որը խայտառակում է իրեն, իր երկիրն ու Եվրոպայի խորհուրդը: Նա քաղաքական ահաբեկիչ է, որն ապօրինի զավթել է իշխանությունը ԵԽԽՎ-ում և ոչնչացնում է ոչ միայն այս կազմակերպությունը, այլև եվրաինտեգրման գաղափարը»,- գրել է Սեիդովը։
Ի պատախան՝ Շվաբեն նրան անվանել է «բռնապետի շնիկ»։
«Ճշմարտությունն այն է, որ դուք երկակի կյանք եք վարել, որը հիանալի է եղել ձեզ համար: Որպես բռնապետի շնիկ՝ հիանալի ժամանակ եք անցկացրել ժողովրդավարական Եվրոպայի քաղաքներում՝ Ադրբեջանում ազնիվ ու պարկեշտ մարդկանց արյան գնով»,- գրել է եվրոպացի պատգամավորը։
Միաժամանակ, ԵԽԽՎ-ում ադրբեջանական պատվիրակության անդամ Ասիմ Մոլլազադեն լրատվամիջոցներին ասել է, թե «Շվաբեի ատելությունն Ադրբեջանի նկատմամբ կապված է ոչ թե Եվրոպայի, այլ նրա անձնական շահերի հետ»։
«Նրա ատելությունն Ադրբեջանի հանդեպ բխում է նրա անձնական, ոչ թե Եվրոպայի շահերից, նա կատարում է իր տերերի պատվերը։ Ատելության նման արտահայտություններով մարդիկ ցանկանում են հաճոյանալ իրենց տերերին՝ հակառակ եվրոպական ու գերմանական արժեքներին»,- ասել է Մոլլազադեն՝ Շվաբեին մեղադրելով ֆինանսական խարդախությունների մեջ։
Հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնադրական պարտավորությունները կատարելու դեպքում։ Ֆրանկ Շվաբեն Ադրբեջանի պատվիրակությանը ձայնի իրավունքից զրկելու որոշման նախաձեռնողներից է։ Այս որոշման ընդունումից հետո էլ գերմանացի պատգամավորը հայտնվել է պաշտոնական Բաքվի քարոզչական թիրախում։
Էմմա Չոբանյան
