23.11.2024 | 20:00
Չի ներկայացվել գույքի և ունեցվածքի 509 հայտարարագիր՝ 4 տարում․ ի՞նչ է սպասվում օրինախախտներին. ՔՆՆԱՐԿՈՒՄ
Պորտուգալիայում կառավարությունը հրաժարվել է փոխհատուցում վճարել իր գաղութային անցյալի համար
Քաղաքականություն
29.04.2024 | 13:44
Պորտուգալիայի կառավարությունը հայտարարել է, որ չի պատրաստվում փոխհատուցում վճարել երկրի գաղութատիրական անցյալի և ստրկավաճառության գործում ակտիվ մասնակցության համար: Պորտուգալիայում պատմության մասին քննարկում է սկսվել այն բանից հետո, երբ երկրի նախագահ Մարսելո Ռեբելո դե Սոուզան իշխանություններին առաջարկել է վճարել անցյալի հանցագործությունների համար, գրում է BBC-ի ռուսական ծառայությունը։
Նման փոխհատուցման անհրաժեշտության մասին Ռեբելո դե Սոուզան նշել էր անցյալ շաբաթ արտասահմանյան լրատվամիջոցների լրագրողների հետ զրույցում։ Նրան հարցրել են՝ արդյո՞ք փոխհատուցումները կապված են այն մարդկանց ժառանգների հետ, որոնց պորտուգալացիները ժամանակին տարել են Աֆրիկայից, հիմնականում՝ Բրազիլիա, և օգտագործել որպես ստրուկներ տնկադաշտերում:
Ի պատասխան՝ նախագահն ուղղակիորեն չի անդրադարձել ստրկությանը, այլ ասել է, որ Պորտուգալիան պետք է «լիովին ընդունի պատասխանատվությունն» անցյալի հանցագործությունների համար, ներառյալ՝ գաղութացման ընթացքում ջարդերն ու թալանը: Միևնույն ժամանակ, Ռեբելո դե Սոուզան նշել է, որ իր երկիրը կարող է «վճարել դրա համար»։
Ավելի ուշ նա բացատրել է, որ կարծում է՝ Պորտուգալիան կարող է փոխհատուցել գաղութատիրական հանցագործությունները՝ ներելով պարտքերը և օգնություն տրամադրելով տուժած պետություններին: Ըստ դե Սոուզայի՝ այս կերպ Պորտուգալիան կկարողանա խուսափել «այլ երկրների ճակատագրից, որոնք կորցրել են իրենց նախկին գաղութների հետ երկխոսելու և հասկանալու ունակությունը»։
Նախագահի այս հայտարարությանն ի պատասխան՝ երկրի աջ կենտրոնամետ կառավարությունը (որում գերակշռում է այն կուսակցությունը, որի նախկին առաջնորդն է եղել Ռեբելո դե Սոուզան) ասել է, որ նման ծրագրեր չունի և հատուցումների հարցում «հետևում է նույն գծին», ինչ իր նախորդները։
