ԱՄՆ-ն Ուկրաինային թույլատրել է հեռահար հրթիռներով հարվածել Ղրիմին․ The New York Times

ԱՄՆ-ը թույլատրել է Ուկրաինայի Զինված ուժերին հարվածել Ղրիմում օբյեկտներին ATACMS հեռահար հրթիռներով, որոնք վերջերս են փոխանցվել Կիևին։ The New York Times-ին պատմել են Պենտագոնի բարձրաստիճան պաշտոնյաները։

Ամերիկյան ռազմական գերատեսչությունն օկուպացված թերակղզին անվանել է ռուսական օդային և ցամաքային ուժերի կենտրոն, «որտեղ Ռուսաստանը մինչ այժմ ուներ համեմատաբար ապահով ապաստան»։ Հետևաբար, ATACMS համակարգերի օգտագործմամբ հարվածների նպատակը կլինի «ավելի մեծ ճնշում գործադրել Ղրիմի վրա», նշել է Պենտագոնի խոսնակը։

Բացի այդ, ATACMS-ը կարող է օգտագործվել Ուկրաինայի այլ օկուպացված շրջաններում ռուսական բանակի թիկունքում հարվածներ հասցնելու համար։ Այս դեպքում հրթիռների թիրախները կլինեն Ռուսաստանի մատակարարման կենտրոնները երկրի հարավ-արևելքում, պարզաբանել են Պենտագոնից։

Ըստ NYT-ի՝ Ուկրաինան ստացել է ATACMS-ի՝ մինչև 300 կմ հեռահարությամբ տարբերակը։ Փոխանցված հրթիռների թիվը չի հաղորդվում։ Անցած աշնանը ԱՄՆ-ը Կիև էր ուղարկել նույն համակարգի հրթիռներ՝ 165 կմ հեռահարությամբ։

Ավելի վաղ NYT-ը հայտնել էր, որ ԱՄՆ-ը գաղտնի 100-ից ավելի ATACMS հրթիռ է փոխանցել Ուկրաինային։ Ուկրաինացի զինվորականներն արդեն օգտագործել են դրանցից մի քանիսը, մասնավորապես, ապրիլի 17-ին Ղրիմի վրա հարձակման ժամանակ։ Այն ժամանակ Ուկրաինայի նախագահ Վլադիմիր Զելենսկին հայտարարել էր թերակղզու հյուսիսում գտնվող Ջանկոյ օդանավակայանի վրա հարձակման մասին, սակայն չէր հստակեցրել, թե ինչ զենք է կիրառվել։ Դրանից երկու օր անց ՌԴ ՊՆ-ն հայտարարել էր, որ հակաօդային պաշտպանության համակարգերը Սև ծովի վրա երեք ATACMS հրթիռ են խոցել։