07.10.2026 | 16:58
Ալիևը զանգահարել է Պուտինին
ԱՄՆ-ն Ուկրաինայի համար 6 միլիարդ դոլարի զենքի արտադրության պայմանագրեր կկնքի. Politico
Քաղաքականություն
26.04.2024 | 14:19
ԱՄՆ-ը պատրաստվում է Ուկրաինայի համար 6 մլրդ դոլարի զենք և ռազմական տեխնիկա գնելու պայմանագրեր կնքել, Politico-ին հայտնել են ամերիկացի երկու պաշտոնյաներ։ Այս միջոցները ներառվելու են 61 միլիարդ դոլար արժողությամբ օգնության ընդհանուր փաթեթում, որն ԱՄՆ նախագահ Ջո Բայդենը ստորագրել է ապրիլի 24-ին։
Պարբերականի զրուցակիցներից մեկի խոսքով՝ Վաշինգտոնը նախատեսում է օգտագործել այդ միջոցները՝ պատվիրելու Patriot զենիթահրթիռային համակարգեր, հրետանային զինամթերք, անօդաչու թռչող սարքեր, անօդաչու թռչող սարքերի և «օդ-օդ» դասի հրթիռների դեմ պայքարի զինամթերք, որոնք կտեղադրվեն կործանիչների վրա։
Բոլոր այս զենքերը, սակայն, Ուկրաինա կհասնեն ոչ թե անմիջապես, այլ մի քանի տարվա ընթացքում։ Դա պայմանավորված է նրանով, որ դրա համար միջոցները կհատկացվեն Ուկրաինայի անվտանգության աջակցության նախաձեռնության ծրագրի շրջանակում, որի շնորհիվ ԱՄՆ ղեկավարությունը երկարաժամկետ պայմանագրեր է կնքում պաշտպանական ձեռնարկությունների հետ՝ Կիևի համար նոր սարքավորումներ ստեղծելու, այլ ոչ թե ընթացիկ պաշարներից այն գնելու համար:
«Անմիջական նպատակն է կանգնեցնել Ուկրաինայի կորուստները և օգնել Կիևին՝ վերականգնել թափը և բեկել մարտադաշտում իրավիճակը: Դրանից հետո նպատակն Ուկրաինային օգնելն է, որ սկսի վերադարձնել իր տարածքը»,- պարզաբանել է պարբերականի զրուցակիցներից մեկը։
Իր հերթին, Ուկրաինայի նախագահ Վլադիմիր Զելենսկին, հաստատելով օգնության փաթեթը, ասել է, որ «այդ աջակցությունն իսկապես կամրապնդի երկրի զինված ուժերը», և Կիևը «շանս կունենա հաղթելու»։
