09.09.2026 | 23:17
Ինչ են քննարկել Փաշինյանը և Մակրոնը. Կառավարությունը մանրամասներ է ներկայացրել
Իսրայելի իշխանությունները հրաժարվել են իրանական ռազմական օբյեկտներին ավելի մեծ հարվածից՝ ԱՄՆ-ի և այլ դաշնակիցների ճնշման ներքո․ NYT
Քաղաքականություն
22.04.2024 | 17:25
Իսրայելի իշխանությունները, ԱՄՆ-ի և այլ դաշնակիցների ճնշման ներքո, հրաժարվել են իրանական ռազմական օբյեկտներին ավելի մեծ պատասխան հարվածից, գրում է New York Times-ը՝ վկայակոչելով երեք անանուն իսրայելցի բարձրաստիճան պաշտոնյաների:
«Իսրայելի առաջնորդներն ի սկզբանե քննարկել են անցած շաբաթ Իրանի ներսում մի շարք ռազմական օբյեկտներին հարվածելու հարցը, այդ թվում՝ Թեհրանի մերձակայքում գտնվող օբյեկտներին»,- գրում է պարբերականը։
Ըստ հրապարակման՝ Թել Ավիվին լայնամասշտաբ պատասխան տալու հարցում տարհամոզել են ԱՄՆ նախագահ Ջո Բայդենը, ինչպես նաև Մեծ Բրիտանիայի և Գերմանիայի արտաքին գործերի նախարարները, ինչի արդյունքում Իսրայելն անցած ուրբաթ «ավելի սահմանափակ» պատասխան հարված է հասցրել։
Իսրայելի ավելի մեծ հարձակումը կմեծացներ տարածաշրջանային ծավալուն հակամարտության հավանականությունը, նշում է թերթը։
Ամերիկյան լրատվամիջոցների փոխանցմամբ՝ ուրբաթ գիշեր Իսրայելը «սահմանափակ» պատասխան հարված է հասցրել Իրանի թիրախներին։
Հիշեցնենք, որ պայթյուններ էին գրանցվել Իրանի Սպահան քաղաքի մոտակայքում։ Իրանական IRIB պետական գործակալությունը հայտնել է, որ երկրի մի շարք նահանգներում անօդաչու թռչող սարքերի մոտենալը կանխելու համար ակտիվացել է հակաօդային պաշտպանությունը։ Իրանի տարածքին հարվածը հասցվել է Իսրայելի վրա անօդաչուներով և հրթիռներով Իրանի հարձակումից գրեթե մեկ շաբաթ անց:
