07.10.2026 | 16:20
Հայաստանի Կիոկուշին կարատեի ֆեդերացիան կանցկացնի «Սամուրայ» մրցաշարը
Թբիլիսիում 14 մարդ է բերման ենթարկվել «օտարերկրյա գործակալների մասին» օրենքի դեմ բողոքի ցույցերի ժամանակ
Քաղաքականություն
16.04.2024 | 11:19
Թբիլիսիում «Օտարերկրյա գործակալների» մասին օրենքի դեմ կազմակերպված բողոքի ցույցի ժամանակ իրավապահները 14 անձ են ձերբակալել, Վրաստանի ՆԳՆ մամուլի ծառայությանը հղում անելով, գրում է Current Time-ը։
Ներքին գործերի նախարարության տվյալներով՝ մեկ ոստիկան վիրավորվել է «ցուցարարների բռնի գործողությունների հետևանքով»։ Նրան բուժօգնություն է ցուցաբերվել։
Ցուցարարները բերման են ենթարկվել մանր խուլիգանության (Վրաստանի վարչական իրավախախտումների մասին օրենսգրքի 166-րդ հոդված) և պետական պաշտոնյաների պահանջներին չենթարկվելու համար (Վրաստանի Վարչական օրենսգրքի 173-րդ հոդված): Ըստ ՆԳՆ-ի՝ հավաքի մասնակիցները «խախտել են հասարակական կարգը, հաշվի չեն առել իրավապահների օրինական պահանջները, դիմադրել են նրանց և վիրավորանքներ հասցրել»։
Ակցիայի կազմակերպիչները մտադիր են այսօր ևս փողոց դուրս գալ խորհրդարանում օրենքի քննարկումներին զուգահեռ, հայտնում է Mtavari-ն։
Հիշեցնենք, որ ապրիլի 15-ի առավոտյան Թբիլիսիում և Վրաստանի այլ քաղաքներում բողոքի ցույցեր են սկսվել «օտարերկրյա գործակալների» մասին օրենքի դեմ։ Մայրաքաղաքում քաղաքացիները հավաքվել են Ռուսթավելի պողոտայում գտնվող խորհրդարանի շենքի մոտ։ Ակցիայի առաջին մասը սկսվել է առավոտյան ժամը 10-ին, երբ խորհրդարանի իրավական հարցերի հանձնաժողովը սկսել է օրինագծի քննարկումը։ Երկրորդը՝ երեկոյան ժամը յոթին։
Վրաստանի խորհրդարանի իրավական հարցերի հանձնաժողովն առաջին ընթերցմամբ հավանություն է տվել «օտարերկրյա գործակալների» մասին օրինագծին։ Այն իր բովանդակությամբ նույնական է անցյալ տարի նախաձեռնված նախագծի համեմատ, որը հետ կանչվեց բողոքի ցույցերի պատճառով:
«Թափանցիկություն ապահովելու համար» օրինագիծը նախատեսում է գրանցամատյանի ստեղծում, որտեղ կնշվեն արտերկրից 20 տոկոսից ավելի ֆինանսավորում ունեցող բոլոր ոչ առևտրային կազմակերպությունները և լրատվամիջոցները։
