11.12.2025 | 23:40
Կոնֆերենցիաների լիգա․ «Նոան» հաղթեց «Լեգիային» ու մոտ է փլեյ-օֆֆի ուղեգրին
Հերթական կոռուպցիոն սկանդալն Ադրբեջանում․ Բաքուն փորձել է 300,000 դոլարով կաշառել իտալացի հայտնի ըմբիշին՝ պարտվելու դիմաց
Քաղաքականություն
12.04.2024 | 14:44
Ադրբեջանը հայտնվել է հերթական կոռուպցիոն սկանդալի կենտրոնում։ Իտալիայի դրոշի ներքո հանդես եկող ըմբիշ, աշխարհի կրկնակի չեմպիոն, Եվրոպայի քառակի և օլիմպիական խաղերի բրոնզե մեդալակիր Ֆրենկ Չամիզոն պնդում է, որ հրաժարվել է 300,000 դոլար կաշառքից՝ անցյալ շաբաթ Բաքվում ըմբշամարտի եվրոպական օլիմպիական որակավորման մրցաշարում դիտավորյալ պարտվելու համար։
Չամիզոն, որը 2011 թվականին Կուբայից ներգաղթել է Իտալիա, կիսաեզրափակիչում վիճելի հաշվարկի արդյունքում պարտվել է ադրբեջանցի ազատ ոճային ըմբիշ Թուրան Բայրամովին։ Օլիմպիական խաղերի ուղեգիր են նվաճում միայն եզրափակիչում հայտնված մարզիկները։ 74 կգ քաշայինների կիսաեզրափակչի վերջում, երբ 8-8 հաշվի ժամանակ Չամիզոն վաստակել է երկու միավոր, ադրբեջանցի մարզիկի մարզիչների բողոքարկումը բավարարվել է, և հաղթանակը տրվել է Բայրամովին։
Մարզասերների ու մասնագետների կարծիքով՝ գոտեմարտում իրականում հաղթել է Չամիզոն, սակայն մրցավարական կողմնակալ որոշումներով հաղթանակը տրվել է ադրբեջանցուն։ Սոցիալական ցանցերում երկրպագուները շարունակում են իրենց դժգոհությունները հայտնել այդ կապակցությամբ։
«Ես գիտեի, որ պետք է կրկնակին, եռակին անեմ Ադրբեջանում, քանի որ ես կռվում եմ նրանց երկրում, և նրանք գնել են բոլորին»,- ասել է Չամիզոն իտալական La Repubblica թերթին տված հարցազրույցում։
«Ես դա արեցի, բայց հետո տեղի ունեցավ մի բան, որը հիշեցնում էր տարիներ առաջ տեղի ունեցած պայքարը: Նրանք եկան ինձ մոտ և ինձ առաջարկեցին 300,000 դոլար՝ պարտության դիմաց։ Չեմ ուզում ասել, թե ով, բայց դա տեղի ունեցավ առավոտյան կշռման ժամանակ»,- ասել է Չամիզոն։
Նա նշել է, որ հրաժարվել է, «քանի որ ներկայացնում է ոչ միայն իրեն, այլ նաև Իտալիան, և իր ազնվությունը հեշտությամբ չի կոտրվում»:
Ավելի վաղ սոցիալական ցանցերում նա հետևյալ գրառումն էր արել․ «Ցանկանում եմ ներողություն խնդրել նրանցից, որոնք նայում են դրան, իմ սպորտը գեղեցիկ է: Սա ընդամենը կաշառված ու կոռումպացված մարդկանց խումբ է։ Ինչքան տխուր է, իմ սիրտը լալիս է»։
Ըմբշամարտի միջազգային ֆեդերացիան (United World Wrestling) հայտնել է, որ պաշտոնական բողոք է ստացել Իտալիայի ըմբշամարտի ֆեդերացիայից գոտեմարտի կապակցությամբ։
«UWW-ն անշեղորեն հավատարիմ է մրցույթի ազնվությանը և արդեն ստացել է իր մրցավարների, ինչպես նաև դատավոր պատվիրակների հաշվետվությունը: Մենամարտերի բոլոր գործողությունները, մրցավարական որոշումները և մարտահրավերները կվերանայվեն ուշադիր և անկախ՝ որոշելու բոլորի պարտականությունները, և կձեռնարկվեն անհրաժեշտ և համապատասխան պատժամիջոցներ: Բոլոր մյուս հայտարարությունները, որոնք արվել են այս մենամարտի և բոլոր ներգրավված անձանց ազնվության վերաբերյալ, նույնպես ենթակա են հետաքննության UWW-ի կողմից»,- ասվում է հայտարարության մեջ։
Հավելենք, որ Ադրբեջանը բավական սերտ կապեր ունի Ըմշամարտի միջազգային ֆեդերացիայի հետ։ Երկար տարիներ Ադրբեջանի նախագահ Իլհամ Ալիևի ընտանիքին պատկանող Ata Holding-ը ֆեդերացիայի գլխավոր հովանավորն էր։
Առաջին անգամ չէ, որ Ադրբեջանը սպորտում կոռուպցիայով է զբաղվում։ 2012 թվականին Բաքուն 9 մլն դոլար էր վճարել Լոնդոնի Օլիմպիական խաղերում բռնցքամարտի երկու ոսկե մեդալների համար։ Ըստ BBC-ի հետաքննության՝ World Series Boxing-ի ղեկավարը Ադրբեջանից 9 մլն դոլար էր ստացել (5,85 մլն ֆունտ սթերլինգ)՝ խոստանալով Լոնդոնի խաղերում երկու ոսկե մեդալ։ Aiba-ն, որը սպասարկում և ղեկավարում է սպորտը Օլիմպիական խաղերում, խոստովանել էր, որ Ադրբեջանի քաղաքացին 9 միլիոն դոլար է վճարել WSB-ին ամերիկյան ֆրանշիզներում ներդրումներ կատարելու համար, միաժամանակ, սակայն, հերքելով մեդալների գնման մասին պնդումները։
Էմմա Չոբանյան
