12.06.2026 | 22:47
Ալեն Ղևոնդյանի նկատմամբ որպես խափանման միջոց է ընտրվել վարչական հսկողությունը
2019 թվականից ի վեր Թուրքիայում արգելվել է քրդերենով առնվազն 28 միջոցառում․ զեկույց
Քաղաքականություն
27.03.2024 | 23:30
Թուրքիայի իշխանությունները 2019 թվականից արգելել են քրդերեն լեզվով առնվազն 28 համերգ և մշակութային միջոցառում երկրի 16 նահանգներում: Այս մասին ասվում է ԶԼՄ-ների և իրավունքի ուսումնասիրությունների ասոցիացիայի (MLSA) զեկույցում, գրում է Turkish Minute-ը։
MLSA-ն զեկույցը ներկայացրել է Եվրոպայի խորհրդի Նախարարների կոմիտեին, որտեղ ուսումնասիրվել են հավաքների ազատության խախտումները։ Զեկույցից պարզ է դառնում, որ արգելված միջոցառումներից 18-ը եղել են համերգներ, 8-ը՝ ներկայացումներ, մեկը՝ սթենդ-ափ շոու, մեկը՝ գրականության թեմայով դասախոսություն։
Քրդերենով առնվազն երկու համերգ և բեմադրություն առանց որևէ պատճառաբանության արգելվել է իշխանությունների կողմից 2024 թվականի սկզբից ի վեր։
MLSA-ն կոչ է արել Եվրոպայի խորհրդին խնդրել Թուրքիային տեղեկատվություն տրամադրել քրդերենով միջոցառումների արգելման մասին՝ միաժամանակ կոչ անելով երկրին վերջ տալ կամայական արգելքներին։
Թուրքիայում մեկը մյուսի հետևից կառավարություններն արգելքներ են սահմանում կամ ճնշում քրդերենը, որը համարվում է Քուրդիստանի աշխատավորական կուսակցության (PKK) հետ կապված:
2016 թվականի հուլիսին Թուրքիայի նախագահ Ռեջեփ Թայիփ Էրդողանի ու իշխող «Արդարություն և զարգացում» կուսակցության դեմ հեղաշրջման փորձից հետո կառավարությունը փակել է քրդերեն լեզվի մի շարք ինստիտուտներ, օրաթերթեր, կայքեր և հեռուստաալիքներ՝ քրդերի քաղաքական շարժման դեմ ուղղված գործողությունների շրջանակում։
Էմմա Չոբանյան
