09.05.2024 | 00:22
Ինչ են քննարկել Փաշինյանն ու Պուտինը
Ադրբեջանը հրաժարվել է մասնակցել Երևանում կայանալիք սամբոյի աշխարհի գավաթի խաղարկությանը
Քաղաքականություն
27.03.2024 | 16:52
Ադրբեջանի սամբոյի հավաքականը չի մասնակցի ՀՀ մայրաքաղաք Երևանում կայանալիք սամբոյի աշխարհի գավաթի խաղարկությանը։ Այս մասին ադրբեջանական լրատվամիջոցներին հայտնել է Ադրբեջանի սամբոյի ֆեդերացիայի պաշտոնական ներկայացուցիչ Յակուբ Աբդուլլաևը։
Մրցույթին մասնակցելուց հրաժարվելու հիմնական պատճառը, ըստ նրա, երկու երկրների հարաբերություններում լարվածությունն է։
«Բոլորը գիտեն, թե ինչպես են վերաբերվել մեր մարզիկներին նախորդ մրցումներին Հայաստանում: Սա բացասաբար է անդրադառնում մեր մարզիկների մոտիվացիայի վրա, ինչպես նաև մեծացնում է անվտանգության մտահոգությունները: Ուստի մեր ֆեդերացիան որոշել է չմասնակցել աշխարհի գավաթի խաղարկությանը, որը կայանալու է Երևանում»,- ասել է նա։
Աբդուլլաևը նշել է, որ հիմնական նպատակը սամբոյի Եվրոպայի առաջնությանը նախապատրաստվելն է, որը կկայանա մայիսին Սերբիայում։
Հավելենք, որ այսօր ավելի վաղ տեղի ունեցած ասուլիսում Հայաստանի սամբոյի ֆեդերացիայի նախագահ Միքայել Հայրապետյանը հայտարարել էր, որ Երևանում կայանալիք աշխարհի գավաթի խաղարկությանը դեռևս մասնակցության հայտ չեն ներկայացրել Ադրբեջանի և Թուրքիայի թիմերը: Նա նաև հայտնել է, որ Արցախից բռնի տեղահանված մարզիկներից մի քանիսն էլ հանդես կգան միջազգային ֆեդերացիայի հովանու ներքո ձևավորված փախստականների թիմից։
Ապրիլի 2-ից սկսած միջազգային ֆեդերացիայի ներկայացուցիչները կժամանեն Երևան: Գավաթի խաղարկությանը, ընդհանուր առմամբ, կմասնակցի 17 երկրի մոտ 300 մարզիկ:
Սամբոյի աշխարհի գավաթի խաղարկությունը Երևանում կանցկացվի ապրիլի 4-5-ը։
Էմմա Չոբանյան
