Դադարել են Արագածոտնի մարզի ընդհանուր իրավասության դատարանի դատավոր Անդրանիկ Մնացականյանի լիազորությունները

Արագածոտնի մարզի ընդհանուր իրավասության դատարանի դատավոր Անդրանիկ Մնացականյանի լիազորությունները դադարել են։ Այս մասին տեղեկանում ենք Բարձրագույն դատական խորհրդի կայքից։ Ըստ ԲԴԽ կայքում առկա տեղեկատվության՝ Մնացականյանն է դիմում ներկայացրել՝ իր լիազորությունները դադարեցնելու վերաբերյալ։
Նշենք որ Անդրանիկ Մնացականյանը նախկինում աշխատել է Վերաքննիչ քրեական դատարանում, սակայն 2023 թվականի հունվարին նշանակվել է Արագածոտնի մարզի դատարանի դատավոր, այսինքն՝ Վերաքննիչ ատյանից տեղափոխվել է առաջին ատյանի դատարան։

Մնացականյանը Վերաքննիչ քրեական դատարանում ներկայում կամ նախկինում աշխատած արդեն 4-րդ դատավորն է, որ վերջին շրջանում հրաժարականի դիմում է ներկայացնում։

Factor.am-ի տեղեկություննեով՝ այս դատավորների հրաժարականները կապված են նրանց միջև նամակագրության հետ, որոնք մեկ այլ դատավորի միջոցով հասանելի են դարձել իշխանություններին։

Նշենք,որ մինչև Մնացականյանի հրաժարականը հրաժարականի դիմումներ են ներկայացրել նաև դատավորներ Արշակ Վարդանյանը, Սերգեյ Մարաբյանը, Կարեն Մարդանյանը։ Factor.am-ի տեղեկություններով՝ թեև վերջին երեք դատավորները հրաժարական էին տվել՝ Անդրանիկ Մնացականյանը պնդում էր, որ ինքը հրաժարականի դիմում չի ներկայացնելու։ Թե այժմ ինչն է ստիպել դատավորին, այնուամենայնիվ, գրել հրաժարականի դիմումը, մեզ հստակ հայտնի չէ։

Հիշեցնենք, որ դատավորների ընդհանուր ժողովի օրը՝ մարտի 15-ին, Անդրանիկ Մնացականյանին լրագրողները հարցեր էին ուղղել նամակագրության հետ կապված։ Մնացականյանը պատասխանել էր, որ ինքը որևէ մեկին չի վիրավորել, որևէ գրագրություն չի հրապարակել։

Արաքս Մամուլյան