ԵՊԲՀ-ն «Ակադեմիական քաղաք» տեղափոխելու մասին քննարկում դեռևս չի անցկացվել

Երևանի պետական բժշկական համալսարանը երեկ Ակադեմիական քաղաքի շրջանակում կլաստերների բաժանման հետ կապված քննարկում է ունեցել լիազոր մարմնի հետ։ Տեղեկությունը Factor.am-ին փոխանցեց ԵՊԲՀ աշխատակազմի ղեկավար Շուշան Դանիելյանը։

«Համալսարանը այս պահին մասնագիտական քննարկումների է մասնակցում։ Եղել են բովանդակային քննարկումներ, որին մասնակցել են ԵՊԲՀ երկու պրոռեկտորները, իսկ մեր կլաստերային քննարկմանը տեղանքի հետ կապված հարցեր չեն եղել», – ասաց Դանիելյանը։

ԵՊԲՀ աշխատակազմի ղեկավարի խոսքով՝ տեղյակ չեն, թե երբ կլինեն բժշկական համալսարանը Ակադեմիական քաղաքի մեջ ընդգրկելու շուրջ հանդիպումներ կամ քննարկումներ։

«Եթե թեկուզ ապագայում լինի, ինձ թվում է՝ բժշկական համալսարանը շատ ուշ ապագայում կլինի Ակադեմիական քաղաքում։ Իսկ թե ինչպես կարձագանքի համալսարանը, դա կախված է, թե ինչ պայմաններով կունենա Ակադեմիական քաղաք տեղափոխման ծրագիրը»,- ասաց Դանիելյանը։

Ակադեմիական քաղաքի հայեցակարգով նախատեսվում է 6 կլաստեր՝ դասական, բժշկական, տեխնոլոգիական, կրթական, արվեստների և սպայական: ՀՀ պետական բուհերի խոշորացման և գիտահետազոտական կազմակերպությունների հետ ինտեգրման գործընթացի շրջանակում ստեղծվել են աշխատանքային խմբեր (կլաստերներ)՝ ոլորտային կազմակերպությունների ներգրավմամբ:

Նշենք, որ կառավարությունը մինչև 2030 թվականը նախատեսում է Ակադեմիական քաղաք կառուցել, որտեղ տեղակայված կլինեն 16 բուհեր։ Ըստ նախագծի՝ այստեղ սովորելու և աշխատելու հնարավորություն կունենա 44 հազար անձ։
2023-ի հոկտեմբերին գործադիրը հաստատել էր ծրագրի հայեցակարգը, որի համաձայն՝ մինչև 2025 թվականի սեպտեմբեր կիրականացվի քաղաքի նախագծումը, այնուհետև կմեկնարկեն շինարարական աշխատանքները, որոնք կավարտվեն 2029 թ․-ի վերջին։

Անի Թամրազյան