17.12.2025 | 20:23
Նազիկ Ավդալյան․ Քաղաքականությամբ զբաղվելու նպատակ չունեմ
Ռուսաստանում դադարեցվել է «Ջերմուկ» հանքային ջրի վաճառքը. կերակրափողի այրվածք ստացած քաղաքացին մահացել է
Քաղաքականություն
13.02.2024 | 17:57
«Ռոսպոտրեբնադզորը» դադարեցրել է Հայաստանից «Ջերմուկ» հանքային ջրի մի քանի խմբաքանակի վաճառքը։ Այս մասին հայտնում է գերատեսչության մամուլի ծառայությունից, փոխանցում է Meduza-ն։
Ռուսական լրատվամիջոցները, վկայակոչելով Հյուսիսային Օսիայի ղեկավար Սերգեյ Մենյայլոյին, գրել էին, թե Վլադիկավկազի 65-ամյա բնակիչը, իբր, կերակրափողի այրվածք է ստացել, երբ խմել է «Ջերմուկ» հանքային ջրի չբացված շշի պարունակությունը, որն ավելի ուշ պարզվել է՝ քացախ է։
Տուժածը տեղափոխվել է Մոսկվայի Սկլիֆոսովսկու անվան գիտահետազոտական ինստիտուտ։ Փետրվարի 13-ին թունավորվածը մահացել է հիվանդանոցում։
«Ռոսպոտրեբնադզոր»-ի փոխանցմամբ՝ կասեցվել է 2023 թվականի դեկտեմբերի 28-ից Ռուսաստան ներկրված կես լիտրանոց ապակե շշերի մեջ փաթեթավորված «Ջերմուկ» հանքային ջրի խմբաքանակների վաճառքը՝ նույն արտադրության ամսաթվով։
Հաղորդվում է, որ Ռուսաստանի 84 շրջաններում գտնվում է գրեթե 2,5 մլն շիշ այդ խմբաքանակից։
Հավելենք, որ ՍԱՏՄ-ից (Սննդի անվտանգության տեսչական մարմին) Factor․am-ին հայտնել էին, որ ռուսական կողմից պաշտոնական ծանուցում չեն ստացել։
Տեսչության իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանն ասել էր․ «Գիտե՞ք, իրականում հոսքագծի մեջ չի կարող մեկ-երկուսի մեջ հանկարծ քացախ լցվել․ քացախ ընդհանրապես չի օգտագործվում «Ջերմուկ»-ի շշալցան պրոցեսում և նույնիսկ լվացման պրոցեսում չի օգտագործվում քացախ։ Կարող է այնտեղ (ՌԴ-ում) շշերը հավաքել են և փորձել են կեղծել․ ամեն դեպքում ռուսական կողմից որևէ պաշտոնական տեղեկատվություն չենք ստացել, եթե, իրոք, մեր արտադրանքի հետ խնդիր է լինում, իրենք ծանուցում են։ Եթե ստանանք պաշտոնական հաղորդագրություն շատ արագ կարձագանքենք»։
