23.02.2026 | 16:29
Արամ Հակոբյանը՝ շախմատի միջազգային մրցաշարի հաղթող
Բաքուն կարող է լքել Եվրոպայի խորհուրդը․ Ադրբեջանում տեղի են ունեցել բարձր մակարդակի քննարկումներ
Քաղաքականություն
31.01.2024 | 17:05
Պաշտոնական Բաքուն շարունակում է քննարկումները ԵԽԽՎ որոշմանն արձագանքելու շուրջ։ Ադրբեջանական իշխանամերձ Trend գործակալությունը, վկայակոչելով իրազեկ աղբյուրին, հայտնում է, որ վերջերս Ադրբեջանի նախագահի աշխատակազմի, Միլլի Մեջլիսի և ԱԳՆ փորձագետների մասնակցությամբ աշխատանքային քննարկումներ են տեղի ունեցել ԵԽԽՎ-ի՝ ադրբեջանական պատվիրակության լիազորությունները դադարեցնելու որոշման առնչությամբ։ Նշվում է, որ քննարկվել են Եվրոպայի խորհրդից Ադրբեջանի դուրս գալու քաղաքական ու իրավական հետևանքները, ինչպես նաև՝ Միջազգային դատարանի իրավասությունը ճանաչելուց հրաժարվելու հնարավորությունն՝ ի պատասխան ԵԽԽՎ-ի մեղադրանքների։
Հիշեցնենք, որ ԵԽԽՎ-ի հուվարի 24-ի լիագումար նիստում որոշվել էր չվավերացնել Ադրբեջանի պատվիրակության լիազորությունները։ Այսպիսով՝ Ադբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր պարտավորությունները կատարելու դեպքում։
Այս որոշումից հետո Ադրբեջանի իշխանական լրատվամիջոցները սկսեցին գրել, թե Բաքուն մտադիր չէ համակերպվել «այս անարդար և կողմնակալ վերաբերմունքի հետ և ներկայում քննարկում է ոչ միայն ԵԽԽՎ-ից, այլև ամբողջությամբ Եվրախորհրդից դուրս գալու ընթացակարգը»։ Ադրբեջանը կարող է նաև հրաժարվել Մարդու իրավունքների եվրոպական դատարանի իրավազորության ճանաչումից։
Ուշագրավ է, որ ԵԽԽՎ-ի որոշմանը Ադրբեջանի ԱԳՆ-ն և նախագահականը պաշտոնապես որևէ կերպ չեն արձագանքել։
