Կաշխատենք միասին տարածաշրջանում կայուն և արժանապատիվ խաղաղության համար․ Բաքվում ԱՄՆ նորանշանակ դեսպան

Ադրբեջանում ԱՄՆ նորանշանակ դեսպան Մարկ Լիբբին հայտարարել է, որ Վաշինգտոնն աշխատելու է տարածաշրջանում կայուն խաղաղության համար։ Այս մասին նա ասել է տեսաուղերձում՝ նշելով, որ անհամբեր սպասում է Ադրբեջանում ԱՄՆ 11-րդ դեսպանի պաշտոնում իր գործունեությունը սկսելու հնարավորությանը, գրում են ադրբեջանական լրատվամիջոցները։

«Որպես ԱՄՆ դիվանագիտական ծառայության կարիերային աշխատակից՝ իմ նախորդ նշանակումները եղել են Լեհաստանում, Կիպրոսում և Բահամներում, Իրաքում ու Բրյուսելում ԵՄ առաքելությունում։ Ես երկար տարիներ նաև աշխատել եմ Վաշինգտոնում։ Ծնունդով Նոր Անգլիայից եմ»,- ասել է դեսպանը։

Նա հավելել է, որ ԱՄՆ դեսպանատունն աջակցել է Ադրբեջանին 1991 թվականին անկախություն ձեռք բերելուց հետո։

«Վերջին 32 տարիների ընթացքում մենք ականատես եղանք զարմանալի փոփոխությունների։ Հուսով եմ, մինչ մենք գտնվում ենք այս տարածաշրջանում, միասին կաշխատենք կայուն և արժանապատիվ խաղաղության համար, կտեսնենք Ադրբեջանի հետագա զարգացումն ու նրա է՛լ ավելի կարևոր դերի շարունակությունը տարածաշրջանում և աշխարհում»,- ասել է դեսպանը։

Նա նաև նշել է, որ արդեն հասցրել է լինել Բաքվի մի շարք վայրերում։

Հիշեցնենք, որ Ադրբեջանի հետ հարաբերությունների լարվածության ֆոնին դեկտեմբերի 2-ի ուշ երեկոյան Բաքու էր ժամանել Մարկ Լիբբին։ Նա սահմանափակվել էր մամուլի համար ադրբեջաներեն կարճ հայտարարությամբ՝ ասելով, որ շատ ուրախ է Ադրբեջան ժամանելու համար։

«Ես անհամբերությամբ սպասում եմ իմ հավատարմագրերը հանձնելու և աշխատանքը սկսելու հնարավորությանը ամերիկա-ադրբեջանական հարաբերությունների զարգացման և տարածաշրջանում կայուն խաղաղության հասնելու համար»,- ասել էր նա՝ շնորհակալություն հայտնելով ջերմ ընդունելության համար։

Կարիերային դիվանագետ Լիբբիին նոյեմբերի սկզբին պաշտոնում հաստատել էր Սենատը՝ նշանակումից գրեթե մեկուկես տարի անց: Վաշինգտոնն Ադրբեջանում դեսպան չուներ անցյալ ամռանից, երբ Լի Լիցենբերգերը հեռացել էր ծառայությունից։

Էմմա Չոբանյան