ԱՄՆ-ը ռուսաստանցի զինվորականների՝ Սուրեն Մկրտչյանին ու ևս երեքի մեղադրում է Ուկրաինայում ամերիկացու դեմ ռազմական հանցագործությունների մեջ

ԱՄՆ-ը ռուսաստանցի չորս զինծառայողների մեղադրանք է առաջադրել ռազմական հանցագործությունների համար մի ամերիկացու նկատմամբ, որն ապրել է Ուկրաինայում ռուսական ներխուժման ժամանակ։ Այս մասին ասվում է մեղադրական եզրակացության մեջ, որը նախօրեին ներկայացրել է Վիրջինիայի դաշնային դատարանը, գրում է CNN-ը:

Այս գործն առաջին դեպքն է, երբ ԱՄՆ կառավարությունը կիրառում է տասնամյակների վաղեմության օրենքը, որի նպատակն է հետապնդել նրանց, ովքեր ռազմական հանցագործություններ են կատարել ԱՄՆ քաղաքացիների դեմ:

Ռուսաստանցի 4 զինծառայողների՝ Սուրեն Մկրտչյանի, Դմիտրի Բուդնիկի և Վալերիի և Նազարի (նրանց ազգանունները չեն հրապարակվել) դեմ մեղադրանք է առաջադրվել չորս կետով, ներառյալ՝ ապօրինի բանտարկություն, ռազմական հանցագործություններ կատարելու դավադրություն, անմարդկային վերաբերմունք և խոշտանգումներ:

Գլխավոր դատախազ Մերրիկ Գարլանդը մեղադրանքներն անվանել է «կարևոր քայլ Ուկրաինայի անօրինական պատերազմի համար պատասխանատվության ենթարկելու նկատակով»:

Ըստ մեղադրական եզրակացության՝ ռուսաստանցի զինվորականներն ամերիկացուն բռնությամբ առևանգել են ուկրաինական Միլովե գյուղի իր տնից։ Ենթադրվում է, որ զինվորները ծեծել և խոշտանգել են ամերիկացուն ռուսական զորամասում, որտեղ նա պահվել է 10 օր 2022 թվականի ապրիլին։ Նրան առևանգելուց հետո ռուսաստանցի զինվորները, մեղադրական եզրակացության համաձայն, մերկացրել են ամերիկացուն, կապել նրա ձեռքերը մեջքի հետևում և ծեծի ենթարկել՝ բռունցքներով, ոտքերով և ատրճանակով հարվածներ հասցրել։

Ըստ մեղադրական եզրակացության՝ Ուկրաինայում ամերիկացու դեմ ռազմական հանցագործությունների մեջ մեղադրվողներից երկուսը Ռուսաստանի Զինված ուժերի հրամանատարներ են, իսկ մյուս երկուսը՝ ավելի ցածր աստիճան ունեցող զինվորականներ։

Ամերիկացին պատերազմի մասնակից չի եղել, 2022 թվականի ամռանը տարհանվել է Ուկրաինայից։

Էմմա Չոբանյան