23.07.2026 | 21:40
Ֆրանսիայում, Իտալիայում և Իսպանիայում անտառային հրդեհների դեմ պայքար է․ Ֆրանսիայի հարավում ավելի քան 10,000 մարդ է տարհանվել
BMW-ն, Volkswagen-ը, Mercedes-ը և Porsche-ն Հայաստանի, Ղազախստանի ու Վրաստանի միջոցով ավտոմեքենաներ են մատակարարել ՌԴ
Քաղաքականություն
06.12.2023 | 20:09
Գերմանական BMW, Volkswagen, Mercedes և Porsche ավտոարտադրողները, հայտարարելով Ռուսաստանից հեռանալու մասին, կտրուկ ավելացրել են իրենց մեքենաների և պահեստամասերի մատակարարումները Կենտրոնական Ասիայի և Անդրկովկասի երկրներ, որտեղից դուրս են գալիս ռուսական շուկա։ Այսպես, միջազգային ֆինանսների ինստիտուտի (IIF) տվյալների համաձայն՝ գերմանական ավտոմեքենաների և դրանց բաղադրիչների արտահանումը Ղրղզստան այս տարվա առաջին ինն ամիսներին, 2019 թվականի նույն ժամանակահատվածի համեմատ, աճել է 5,500%-ով։
Աճել է նաև գերմանական ավտոպահեստամասերի արտահանումը դեպի Ղազախստան, Հայաստան և Վրաստան՝ համապատասխանաբար 720%, 450% և 340%-ով։ Մատակարարումների նման աճը հստակ նշան է, որ Ռուսաստանը երրորդ երկրներին օգտագործում է արևմտյան ապրանքներին հասանելիություն ունենալու համար, նշում է IIF-ը:
«Աճի տեմպերն այնքան մեծ են, որ թվում է, թե դա միակ տրամաբանական բացատրությունն է»,- ասում է ինստիտուտի գլխավոր տնտեսագետ Ռոբին Բրուքսը։
«Գերմանացի արտադրողներն ու մատակարարները զանգվածաբար կրճատել են իրենց բիզնեսը Ռուսաստանում, խզել են հարաբերությունները դիլերների հետ և դադարեցրել բիզնես գործունեությունը»,- ասել է Ավտոմոբիլային արդյունաբերության գերմանական ասոցիացիայի (VDA) ներկայացուցիչը:
Ասոցիացիայի սեփական տվյալները ցույց են տալիս, որ գերմանական ավտոմեքենաների արտահանումը Ղրղզստան, Ղազախստան, Հայաստան և Վրաստան այս տարի աճել է 156 տոկոսով՝ 2021 թվականի առաջին տասը ամիսների համեմատ։ Միաժամանակ, ասոցիացիան հաշվում է միայն նոր մեքենաների և պահեստամասերի վաճառքը։
Կազմակերպությունը նշում է, որ ավտոմեքենաների արտահանումը Ռուսաստան կրճատվել է 36 հազար միավորով, իսկ Կենտրոնական Ասիա է ուղարկվել ընդամենը 1600 նոր ավտոմեքենա։
Զուգահեռ ներմուծման միջոցով, գերմանական մեքենաներից բացի, Ռուսաստանը կարող է ներմուծել 500 տարբեր արևմտյան մոդելներ, որոնք ներառված են ՌԴ արդյունաբերության և առևտրի նախարարության ցանկում, ինչպես նաև արևմտյան շատ այլ ապրանքներ, նշել է Capital Economics-ում զարգացող շուկաների հարցով ավագ տնտեսագետ Լիամ Փիչը:
