19.12.2025 | 14:02
40-ամյա Ռոնալդուի տրանսֆերային արժեքը չի փոխվել
Ալիևը Հայաստանից երաշխիքներ է պահանջել, որ «ռևանշի փորձեր չեն լինի», նաև խոսել Բրյուսելում հնարավոր հանդիպումից
Քաղաքականություն
06.12.2023 | 13:07
Բաքվին երաշխիքներ են անհրաժեշտ, որ Երևանում «ռևանշի փորձեր չեն լինի»։ Նման հայտարարություն է արել Ադրբեջանի նախագահ Իլհամ Ալիևը Բաքվում անցկացվող համաժողովի շրջանակում։
«Ադրբեջանին պետք են երաշխիքներ, որ Հայաստանում ռևանշիզմի փորձեր չեն լինի»,- ասել է նա՝ նշելով, թե Ադրբեջանին դա պետք է, քանի որ «գիտեն, թե ինչ է կատարվում Հայաստանում, տեղյակ են եվրոպական որոշ մայրաքաղաքներում խորհրդատուների մասին»։
«Մենք կցանկանայինք, որ երկու երկրների միջև ընդհանրապես պատերազմ չլիներ, և այդ հարցում երաշխիքներ պետք է լինեն»,- ասել է Ալիևը։
Ադրբեջանի նախագահը հայտարարել է, որ հայկական կողմը «պետք է մոռանա պատմության մեջ մնացած ԼՂՀ-ի մասին և անցնի սահմանազատման գործընթացին»։
Ալիևը նշել է, որ Հայաստանի և Ադրբեջանի միջև խաղաղության պայմանագիրն այնքան էլ ծավալուն չէ, «այն կազմված է առավելագույնը 6-7 էջից, ունի քիչ քանակությամբ հոդվածներ»։ Նրա խոսքով՝ Ադրբեջանի ԱԳՆ-ն գնահատում է հայկական կողմի առաջարկներն ու իր առաջարիները ժամանակին կուղարկի Երևան։
Հայաստանի հետ հանդիպումներից արդեն մի քանի անգամ հրաժարված Ալիևն ակնարկել է Բրյուսելում հնարավոր հանդիպման մասին։
«Հաշվի առնելով, որ մինչ օրս մենք արդեն անցկացրել ենք 5 հանդիպում, հաջորդ հանդիպումը պետք է միտված լինի արդյունքներին։ Հայաստանը, Ադրբեջանը և ԵՄ-ն պետք է համաձայնության գան հայտարարության նախագծի շուրջ։ Մենք պետք է լավ պատրաստվենք հանդիպմանը»,- հավելել է Ալիևը։
Էմմա Չոբանյան
