29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Էրդողանը Նեթանյահուին անվանել է «Գազայի դահիճ»
29.11.2023 | 16:14
Թուրքիայի նախագահ Ռեջեփ Թայիփ Էրդողանը «Արդարություն ու զարգացում» խմբակցության նիստի իր ելույթում մեղադրանքներ է հնչեցրել Իսրայելի հասցեին։
«Նրանք բառացիորեն ցեղասպանություն են իրականացրել 2,3 միլիոն մարդու նկատմամբ՝ կտրելով նրանց սնունդը, վառելիքը, դեղորայքը, հացը, լույսը, ջուրը, կապը, շրջափակելով 360 կիլոմետրանոց բացօթյա բանտում»,- ասել է Էրդողանը՝ Իսրայելի վարչապետի հասցեին սուր քննադատություն հնչեցնելով։
«Գազայում անցյալ դարի ամենամեծ ոճրագործություններից մեկը կատարած Նեթանյահուն իր անունը պատմության մեջ արդեն գրել է որպես «Գազայի դահիճ»։ Այս սև խարանը ոչ միայն Նեթանյահուի ճակատին է, այլև բոլոր նրանց, ովքեր նրան անվերապահորեն աջակցում են։ Ամոթի այս բիծը երբեք չի մաքրվի»,-ասել է Թուրքիայի նախագահը։
Նա նշել է, որ «երբեք չեն մոռանա Գազայում կատարված մարդկության դեմ հանցագործություններն ու պատերազմը, արևմտյան երկրների անգործությունը, բացառությամբ մեկ-երկուսի»։
«Մենք կփորձենք բոլոր հնարավոր միջոցները՝ Իսրայելի կառավարությանը պատասխանատվության ենթարկելու միջազգային իրավունքի, ինչպես նաև մարդկային խղճի առաջ»,-հայտարարել է Թուրքիայի ղեկավարը։
Հիշեցնենք, որ ավելի վաղ էլ Էրդողանը Իսրայելն անվանել էր «ահաբեկչական պետություն»։
