15.11.2024 | 23:30
Թուրքիայի նախագահականը հերքում է Էրդողանի և նրա դաշնակից Բահչելիի միջև տարաձայնությունները քրդական հարցի շուրջ
Պեմզաշենի գործով մեղադրյալների նկատմամբ ընտրված խափանման միջոց կալանքը երկարացվեց 3 ամսով
Հասարակություն
09.11.2023 | 15:22
Պեմզաշենում տեղի ունեցած դաժան սպանության գործով անցնող մեղադրյալների նկատմամբ կիրառված խափանման միջոց կալանքը երկարացվեց 3 ամսով: Այսօր գործով նախնական դատալսումների ժամանակ մեղադրող Արեգ Խաչատրյանը միջնորդեց երկու մեղադրյալների նկատմամբ էլ կալանք կիրառել` ի թիվս այլնի` նշելով, որ նրանց երկուսին էլ մեղսագրվում են արարքներ, որոնց համար ընդհուպ ցմահ ազատազրկում է նախատեսվում: Տուժողի ներկայացուցիչ Գարիկ Գալիկյանն էլ շեշտեց, որ գործով վկաներն՝ այն գյուղում են ապրում, որտեղ մինչև կալանավորվելն ապրել են Վրույր Բարսեղյանը և Արկադի Բարսեղյանը, ուստի՝ առկա է ռիսկ, որ նրանք ազատության մեջ գտնվելու դեպքում կփորձեն ազդեցություն ունենալ վկաների նկատմամբ:
«Պիտի գնդակահարեն»,- դիրքորոշում հայտնելիս ասաց տուժող Սևակ Մելիքսեթյանն, ում ընտանիքը սպանվել է, հետո ավելացրեց, որ ինքը միանում է դատախազի և իր ներկայացուցչի դիրքորոշմանը:
Արկադի Բարսեղյանի պաշտպան Գայանե Լյուդվիգյանը միջնորդեց իր պաշտպանյալի նկատմամբ կիրառված կալանավորումը փոխել և որպես խափանման միջոց կիրառել ողջամիտ չափով գրավը և տնային կալանքը կամ վարչական հսկողությունը: Արկադի Բարսեղյանն էլ դիրքորոշում հայտնելիս անդրադարձավ տուժող Մելիքսեթյանի հայտարարությանը, թե իրեն պետք է գնդակահարել:
«Կբացահայտվի, թող վառեն, ոչ թե գնդակահարեն: Ես կյանքում չեմ ուզի ուրիշի արածի համար դատվեմ: Ինձ խայտառակ են արել աշխարհով մեկ: Ես էդ տղեն չեմ, որ կարողանամ այդպիսի բան անել»,-հայտարարեց Արկադի Բարսեղյանը:
Վրույր Բարսեղյանի պաշտպան Էդուարդ Աղաջանյանն էլ դիտարկեց, որ անձին վերագրվող հանցանքի ծանրությունը հիմք չէ նրա նկատմամբ կալանքը որպես խափանման միջոց ընտրելու համար․ա նա ևս միջնորդեց իր պաշտպանյալի նկատմամբ ընտրված խափանման միջոց կսլանքը վերացնել, այլ խափանման միջոց ընտրել: Դատարանը որոշեց պաշտպանների միջնորդությունները մերժել, իմ մեղադրանքի կողմի միջնորդությունը բավարարել ու մեղադրյալների նկատմամբ ընտրված կալանքի ժամկետը երկարաձգել երեք ամսով` մինչև փետրվարի 12-ը:
Արաքս Մամուլյան
