Քաղաքականություն
07.11.2023 | 11:46
Լաչինի միջանցքից առևանգված Վագիֆ Խաչատրյանի շինծու գործով դատական նիստում պետական մեղադրող, գլխավոր դատախազի ավագ օգնական Մեղադիս Սուլթանովը պահանջել է նրան 15 տարվա ազատազրկման դատապարտել։ Նա նշել է, որ Խաչատրյանը պատժի առաջին 5 տարիները պետք է կրի բանտում, մնացածը՝ խիստ ռեժիմի քրեակատարողական հիմնարկում։ Դատախազն ասել է, որ, իբր, Խաչատրյանի մեղքը ապացուցվել է դատական քննության ընթացքում։
Հավելենք, որ Վագիֆ Խաչատրյանի դեմ դատական գործընթացն ընթանում էր միջազգային իրավական նորմերի խախտմամբ, որի մասին Հայաստանը բազմիցս է հայտարարել։
Չնայած Բաքվի կողմից կազմակերպված դատական ֆարսին, տուժողների վկայություններին ու ճնշումներին՝ Վագիֆ Խաչատրյանը մշտապես հայտարարել է, որ որևէ հանցանք չի գործել։ Փաստական առումով Խաչատրյանի մեղքը հաստատող որևէ ապացույց չի ներկայացվել։
Հիշեցնենք՝ Կարմիր Խաչի միջազգային կոմիտեի ուղեկցությամբ հուլիսի 29-ին բուժման նպատակով Արցախից Հայաստան տեղափոխվող Վագիֆ Խաչատրյանն առևանգվել էր Լաչինի միջանցքի ապօրինի անցակետում։ Այնուհետև Բաքուն նրան շինծու մեղադրանքներ էր առաջադրել «զանգվածային սպանությունների» համար։
Էմմա Չոբանյան
