22.05.2026 | 12:13
Դատախազը դիմել է ԿԸՀ-ին՝ Անդրանիկ Թևանյանին անձեռնմխելիությունից զրկելու և քրեական հետապնդում սկսելու միջնորդությամբ
Վերադարձ Արցախ. ում է շահավետ նման սցենարը և ով է ապահովելու այդ իրավունքի իրացումը. ՏԵՍԱՆՅՈՒԹ
Քաղաքականություն
20.10.2023 | 19:47
Արցախից 1000-ից ավելի բնակիչների բռնի տեղահանումից մեկ ամիս անց չկա որևէ քննարկում արցախահայերի՝ իրենց տներ վերադառնալու իրավունքը վերականգնելու հետ կապված։ Արցախի հայաթափումը սկսվեց սեպտեմբերի 19-ին Ադրբեջանի ձեռնարկած ռազմական գործողություններից հետո։ Այժմ Արցախում 100-ից էլ քիչ հայեր են մնացել։
Factor TV-ն այսօր ԱԳ փոխնախարար Վահան Կոստանյանից հետաքրքրվեց, թե արցախցիների՝ իրենց հայրենիքում ապրելու իրավունքները վերականգնելու համար ի՞նչ գործընթացներ են իրականացվում։ Բարձրաստիճան պաշտոնյան հստակ ծրագրերի մասին ոչինչ չասեց։
Իրավապաշտպան Նինա Կարապետյանցը հակադարձում է փոխնախարարին՝ ընդգծելով` ոչինչ չի արվում ոչ միայն Հայաստանի, այլև Արցախի կառավարության կողմից։
Արցախահայության վերադարձի հետ կապված երեք հիմնական տեսակետ է շրջանառվում, որ այդպիսով հնարավոր կլինի Արցախը պահել հայկական, սակայն ռիսկեր կան, որ այն շահեկան կլինի միայն Ադրբեջանի և ՌԴ-ի համար։ Նինա Կարապետյանցն իրատեսական է համարում արցախցիների վերադարձը Լեռնային Ղարաբաղ, եթե ամբողջական ծրագիր իրականացվի։
Հայաստանի Մարդու իրավունքների առաջին պաշտպան Լարիսա Ալավերդյանը կեղծ է համարում այն թեզը, թե իրավունքները վերականգնելու համար պարտադիր է հայերի վերադարձն Արցախ։
Մարդու իրավունքերի նախկին պաշտպաններից Արման Թաթոյանը շեշտում է՝ մարդու անօտարելի, բնական իրավունքներից է իր բնակավայր վերադարձը։ Ըստ նրա, սակայն, վերադարձից առաջ անվտանգային լուրջ երաշխիքներ են անհրաժեշտ։
Իշխանության ներկայացուցիչներն էլ են երաշխիքներից խոսում, սակայն անհայտ է, թե կառավարությունն ինչ է անում՝ այն ապահովելու համար։
Արցախցիները, որոնք ԼՂ վերադառնալու ցանկություն ունեն, հստակ ընդգծում են՝ կվերադառնան, եթե ադրբեջանցիներն այնտեղից հեռանան։
Մանրամասները՝ տեսանյութում։
Նարեկ Կիրակոսյան
