Կոչեր, դատապարտումներ․ ինչպես է միջազգային հանրությունն արձագանքել Բաքվի ագրեսիային. ՏԵՍԱՆՅՈՒԹ

Եվրախորհրդարանի անդամները կոչ են արել ԵՄ խորհրդին՝ քննարկել Լեռնային Ղարաբաղում ռազմական գործողությունների համար Ադրբեջանի իշխանությունների դեմ պատժամիջոցներ սահմանելու հարցը։ Այս մասին ասվում է ԵԽ-ի հայտարարության մեջ։

«Մենք վճռականորեն դատապարտում ենք այսօր Լեռնային Ղարաբաղի վրա Ադրբեջանի կողմից նախապես ծրագրված և չարդարացված հարձակումը։ Շարունակվող հարձակումն անհապաղ չդադարեցնելու դեպքում մենք կոչ ենք անում ԵՄ խորհրդին՝ հիմնովին վերանայել հարաբերությունները Ադրբեջանի հետ և քննարկել Ադրբեջանի պատասխանատու իշխանությունների դեմ պատժամիջոցներ կիրառելու հարցը»,- ասվում է հայտարարությունում։

Ֆրանսիան մեծագույն վճռականությամբ դատապարտում է Լեռնային Ղարաբաղում Ադրբեջանի կողմից ռազմական գործողության սանձազերծումը՝ ծանր զինատեսակների կիրառմամբ, այդ թվում՝ բնակեցված գոտիների դեմ: Ֆրանսիան կոչ է անում Ադրբեջանին անհապաղ դադարեցնել հարձակումը և հարգել միջազգային իրավունքը: Ֆրանսիան նաև պահանջում է հրատապ ՄԱԿ ԱԽ նիստ հրավիրել։

Լիտվայի ԱԳ նախարարը Ադրբեջանին կոչ է արել անհապաղ հրադադար հաստատել։

«Ղարաբաղի հայերի նկատմամբ ամիսներ տևած շրջափակումից հետո Ադրբեջանի սկսած ռազմական գործողությունները խաթարում են տևական խաղաղություն հաստատելուն ուղղված միջազգային հանրության ջանքերը։ Կոչ ենք անում անհապաղ հրադադար հաստատել և սկսել երկխոսություն Բաքվի և Ղարաբաղի հայերի միջև, քանի որ դա խաղաղ համակեցություն տանող միակ ճանապարհն է»,- գրել է Լիտվայի ԱԳ նախարար Գաբրիելիուս Լանդբերգիսը։

Գերմանիայի արտաքին քաղաքական գերատեսչության նախարար Անալենա Բերբոկն ընդգծել է, որ Ադրբեջանը պետք է դադարեցնի գնդակոծությունները և վերադառնա բանակցությունների սեղանի շուրջ։ Բերբոկն ընդգծել է, որ իրենք աջակցում են ԵՄ-ի ղեկավարության ներքո ընթացող բանակցություններին։

Լյուքսեմբուրգի ԱԳ նախարարը հայտարարել է․ «Հնարավոր ամենախիստ ձևով դատապարտում եմ Ադրբեջանի ռազմական գործողությունները ԼՂ-ում։ Ռազմական գործողությունները, մասնավորապես բնակեցված շրջաններում, անհապաղ պետք է դադարեցվեն, քաղաքացիական բնակչության կյանքը պետք է պաշտպանվի։ Ադրբեջանը պետք է հետևի իր միջազգային պարտավորություններին»:

Ավստրիայի ԱԳ նախարարությունը Բաքվին կոչ է անում դադարեցնել Արցախում ռազմական գործողությունները։

«Չափազանց անհանգստացած ենք Հարավային Կովկասում հարձակողական գործողություններից։ Մենք կոչ ենք անում Ադրբեջանին անհապաղ դադարեցնել ցանկացած ռազմական գործողություն։ Հիմա պետք է ապաէսկալացիա»,- ասվում է Ավստրիայի ԱԳՆ-ի X-ի էջում գրառման մեջ։

Մեծ Բրիտանիայի Եվրոպայի հարցերով պետնախարար Լեո Դոքերթին հայտարարել է,որ Բաքուն պետք է դադարեցնի Արցախում ռազմական գործողությունները։

«Լեռնային Ղարաբաղ երեկվա ողջունելի մարդասիրական մուտքից հետո տարածաշրջանում ռազմական հակամարտության վերադարձը կործանարար է տեղի բնակչության համար։ Ադրբեջանը պետք է դադարեցնի ռազմական գործողությունները»,-ասվում է Դոքերթիի x-ի էջում գրառման մեջ։ Նա նշել է,որ Մեծ Բրիտանիան քրտնաջան աշխատում է երկխոսություն խթանելու համար և որ բռնությունը երբեք լուծում չէ։

Freedom House միջազգային իրավապաշտպան կազմակերպությունը խստորեն դատապարտ է Լեռնային Ղարաբաղում Ադրբեջանի կառավարության կատաղի հարձակումները, որոնք մեծացնում են տարածաշրջանի հայ բնակչության էթնիկ զտումների վտանգը։

«Տարածաշրջանի ժողովրդագրական պատկերը փոխելու ցանկացած փորձ անօրինական է և անընդունելի: Մենք կոչ ենք անում միջազգային հանրությանը պաշտպանել ԼՂ խաղաղ բնակչությանը, կանխել մարդկության դեմ ցանկացած հանցագործություն տարածաշրջանում և պատասխանատվության ենթարկել Ադրբեջանի կառավարությանը՝ տարածաշրջանում հայերի ապահովության համար»,- ասվում է կազմակերպության X-ի էջում գրառման մեջ։