16.05.2026 | 14:16
Հայաստան-Թուրքիա սահմանը պետք չէ դարձնել երկնային Երուսաղեմի դարպասները․ Մարուքյան․ ՏԵՍԱՆՅՈՒԹ
Պրիգոժինի ապստամբությունից հետո ձերբակալված գեներալ Սուրովիկինն ազատ է արձակվել․ The New York Times
Քաղաքականություն
05.09.2023 | 14:25
Գեներալ Սերգեյ Սուրովիկինը, որը, ենթադրաբար, ձերբակալվել էր Եվգենի Պրիգոժինի ապստամբությունից հետո, ազատ է արձակվել։ Այս մասին հայտնում է The New York Times-ը՝ վկայակոչելով երկու ամերիկացի պաշտոնյաների և ՌԴ Պաշտպանության նախարարությանը մոտ կանգնած իր աղբյուրին, փոխանցում է Meduza-ն։
ԱՄՆ-ում լրատվամիջոցի զրուցակիցների խոսքով՝ չնայած նրան, որ Սուրովիկինն ազատ է արձակվել, առայժմ պարզ չէ՝ արդյո՞ք նրա համար որևէ սահմանափակում մնում է, մասնավորապես՝ տեղաշարժի հարցում։
ՌԴ ՊՆ-ին մոտ աղբյուրն էլ ասել է, որ գեներալը պահպանել է կոչումը և «տեխնիկապես» դեռևս գործող սպա է զինված ուժերում, սակայն նա այլևս չունի «կարիերայի հեռանկար»։ Զրուցակիցը նաև հայտնել է, որ Սուրովիկինն ազատ է արձակվել օգոստոսի 23-ին Եվգենի Պրիգոժինի ավիավթարից մի քանի օր անց։
Սերգեյ Սուրովիկինի ազատ արձակման մասին սեպտեմբերի 4-ին հայտնել է լրագրող Քսենյա Սոբչակը։ Տելեգրամի իր ալիքում նա լուսանկար է հրապարակել, որտեղ, իբր, պատկերված է գեներալը։
«Գեներալ Սերգեյ Սուրովիկինը դուրս է եկել։ Ողջ է և առողջ, տանը, ընտանիքի հետ, Մոսկվայում»,- գրել է Սոբչակը։
Նախօրեին Սոչիում ռուս-թուրքական բանակցություններից հետո կայացած ճեպազրույցում պաշտպանության նախարար Սերգեյ Շոյգուին հարցրել էին՝ արդյո՞ք Սուրովիկինի նկատմամբ հետաքննություն է ընթանում։ Շոյգուն, սակայն, չէր պատասխանել հարցին։
Էմմա Չոբանյան
