24.07.2026 | 23:45
Գագիկ Ծառուկյանի նկատմամբ նոր հանրային քրեական հետապնդում է հարուցվել. փաստաբան
Ադրբեջանը թուրքական ընկերության հետ Սու-25-երի արդիականացման վերաբերյալ համաձայնագիր է ստորագրել
Քաղաքականություն
26.07.2023 | 18:11
Ադրբեջանի Պաշտպանության նախարարության և թուրքական TUSAŞ ընկերության միջև ստորագրվել է Սու-25 կործանիչների արդիականացման համաձայնագիր։ Ադրբեջանական լրատվամիջոցների հաղորդմամբ՝ համաձայնագրի ստորագրման արարողությունը տեղի է ունեցել Ստամբուլում IDEF-23 պաշտպանական արդյունաբերության 16-րդ միջազգային ցուցահանդեսի շրջանակում։
Փաստաթուղթը ստորագրել են Ադրբեջանի պաշտպանության փոխնախարար, ռազմատեխնիկական մատակարարման գլխավոր վարչության պետ Ագիլ Գուրբանովը և TUSAŞ-ի գլխավոր տնօրեն Թեմել Քոթիլը։
Հավելենք, որ դեռևս ամիսներ առաջ Թուրքիայի նախագահի աշխատակազմի պաշտպանական արդյունաբերության վարչությունն այդ ժամանակ գլխավորող Իսմայիլ Դեմիրը հայտնել էր, որ Ադրբեջանի հետ կան մի շարք համատեղ ծրագրեր, այդ թվում՝ ռուսական արտադրության Սու-25 մարտական ինքնաթիռների արդիականացմանը վերաբերող, որոնք առկա են Ադրբեջանի զինանոցում։
«Բացի արդիականացումից՝ մենք ունենք նախագծեր՝ կապված Սու-25-երի վրա որոշ զինատեսակների տեղադրման և խելացի համակարգերի ավելացման հետ»,- ասել էր Դեմիրը։
Ստամբուլում ընթացող պաշտպանական արդյունաբերության ցուցահանդեսին մասնակցում է նաև Ադրբեջանի ՊՆ ղեկավար Զաքիր Հասանովը։ Նախօրեին նա բանակցություններ է անցկացրել Թուրքիայի պաշտպանության նախարար Յաշար Գյուլերի հետ։
Էմմա Չոբանյան
